رد: كلمات اغاني الاستاذ مصطفي سيد احمد...

من طرف **دمعات الندم** الأحد مايو 23, 2010 7:50 pm

مريـم الآخــــرى
محمد عبد الله شمو

هاهى الأرض تغطت بالتعب
البحار إتخذت شكل الفراغ
وأنا مقياس رسم للتواصل .. والرحيل
وأنا الآن الترقب .. وإنتظار المستحيل
أنجبتنى مريم الأخرى قطاراً وحقيبة
أرضعتنى مريم الأخرى قوافى
ثم أهدتنى المنافى
هكذا قد خبرونى .. ثم قالوا لى ترجـّل
***********
ثم أنتِ .. أنت ياكل المحاور .. والدوائر
يا حكايات الصبا
تحفظين السر .. والمجد الذى مابين نهديك .. إختبا
ليس يعنيك الذى قد ضاع من عمرى هباء
وأنا .. يا صغيرتى .. لست أدرى ما الذى يدفعنى دفعاً .. إليك
ما الذى يجعلنى أبدو حزيناً
حين أرتاد التسكع .. فى مرايا وجنتيك
لا عليك
فعلي هذه السفوح .. المطمئنة
نحن قاتلنا سنيناً .. وأقتتلنا
نحن سجلنا التآلف .. فى إنفعالات الأجنة
وأحتوانا البحر .. والمد اليقاوم .. والشراع
يا هذه البنت التى
تمتد فى دنيايا سهلاً .. وربوعاً .. وبقاع
ما الذى قد صبّ فى عينيك شيئاً من تراجيديا الصراع
******
والمدى يمتد وجداً عابراً هذى المدينة
خبرينى هل أنا أبدو حزينا
هل أنا القاتل .. والمقتول حيناً .. والرهينة
هل أنا البحر الذى لا يأمن الآن السفينة ؟
خبئينى بين جدران المسام
قبلينى مرةً فى كل عام
فأنا أحتاج أن ألقاكِ فى كل عام
أنا أحتاج أن ألقاكِ فى ذرات جسمى
فى الشرايين المليئة بإنقلابات المزاج
فى إنعكاس الضوء
فى النافذة الأولى .. وبلـّور الزجاج
.. هكذا قد خبرونى .. ثم قالوا لى ترجل
***********
وعلى أطروحة الحلم المسافر .. ألتقيك
على حمى الرحيل المستمر .. الآن .. فى كل المواطن ألتقيك
فى مساحات التوهج .. فى جبينى .. ألتقيك
فى إنشطار الوقت .. فى كل الذرى
وفى حكايات الطفولة .. إذ يعود بنا الزمان .. القهقرى
آه لو تأتين يا سيدتى .. من كل فجٍ .. وأتجاه
من عميق الموج من صلب المياه
تستطيعين التنقل بين أرجائى وظلى
تستطيعين التوهج .. عند لحظات التجلى
ولعينيك إمتلاك وثائقى .. حتماً .. وقلبى
ولعينيك التنصل .. عن مواثيقى ودربى
هكذا قد خبرونى .. ثم قالوا لى ترجل
**********
وأنا أبحث عن صيغة هذا البعد .. هذا اللاّ نهائى
عن قرار الشعر .. عن لون التـّغرُّب
بين جدران المقاهى
آه لو تأتين ... آهِ
تجدين الإِلف الممتد سهولاً .. بإنتظارك
وأنا .. كالحذر المنساب .. خوفاً
بين صالات الجمارك
كالرحيل .. كالترقب .. وإنتظار المستحيل
هكذا قد خبرونى
ثم قالوا لى ترجل

من طرف **دمعات الندم** الأحد مايو 23, 2010 7:52 pm

الطـيــــــــور
حــافظ عـباس

والله نحنّ مع الطيور..

الما بتعرف ليها خرطة

ولا فى إيدا جواز سفر

نمشى فى كل المدائن

نبنى عشنا بالغناوى

.. وننثر الأفراح .. درر

والربيع يسكن جوارنا

والسنابل تملا دارنا

والرياحين .. والمطر

*********

والحبيبة تغنى لينا

لا هموم تسكن دروبنا

.. ولا يلاقينا الخطر

*********

إلاّ باكر يا حليوة

لمـّا أولادنا السمر

يبقوا أفراحنا البنمسح بيها .. أحزان الزمن

نمشى فى كل الدروب الواسعة .. ديك

والرواكيب الصغيرة .. تبقى أكبر من مدن

إيدى فى إيدك نغنى

والله نحنّ .. مع الطيور

الما بتعرف ليها خرطة

ولا فى إيدا جواز سفر

من طرف **دمعات الندم** الأحد مايو 23, 2010 7:54 pm

ليـه غبتـي يا قمـــره
قاسم أبو زيد

ليه غبتى يا قمرة
نركب جياد الليل
وإنشرّ بينّا صباح
سفر العتامير .. ليل
نرجاكَ فى المطرة
أرجع تعال .. يا شليل
دِرع الأميرة .. سـِرِق
سووهو حِدوة خيل
بحر العطاشا .. نِشِف
نشرب بواقى السيل
******
صُدْ لى ملامحك .. يا حراز
ريح العوارِض ... غرّبتْ
فرتِق ضفايرك .. لى الرزاز
... جية العصافير .. قرّبتْ

من طرف **دمعات الندم** الأحد مايو 23, 2010 7:55 pm

قاسم ابوزيد
ادفقي ما تبقي رقراق

ابقي ياضل ياشموس

غطي الساحات بالوضوح

انهضي الشوق البدوح

وهجك شوارع ذاتي في ليل اليباب

ما تشفقي العطش الرحيل

النيل ركيزة ودمعة الاحباب سحاب

ما تخافي من دم الغروب

لو رتش اللوحة الضباب

ما دام ضمير الفينا حي

ما دام عريق العشق حي

ملحوقة يامدن السراب

نديانة بفرح التساب

ادفقي فيضان عمر وفجي الوجع

دمع الالم ما يهددك ما خاب غناك

فارسك رجع ..

اتوهجي انت الشمس اتلهجي

نورك سطع نور بوادينا الكساح

رقصت مزامير الصباح

مبكية قرية وقنبلة

مسقية دمعة وسنبلة

الليلة في ايدنا السلاح

ريشة ..وكدنكة .. ومطرقة ..

نبنيك احسن يا ظروف ..

مخضرة دانية القطوف ..

نطوي المسافات نسبقا

ادفقي بلدك فداك .. اتوهطي

وري البنيات العزيز

محمية بعرق الترابلة ونغمتك

مسقية بالريد العتيق ..

انغام ربباتك تشيل معزوفة الليل والرفيق

ما تصغري تكبر اماني السنبلة هيا اكبري

تصغر معاني القنبلة

ما ترجعي الصد للمدائن والقرى

شيلي الشحوب والاصفرار

ادي البويتات مظرا

ادفقي في كل شارع وكل بيت

في روابينا المحنة في ضمائرنا السهول

ادفقي في كل حتة وكل زول

وابقي شان تحي الحصول

من طرف **دمعات الندم** الأحد مايو 23, 2010 7:58 pm

نورة

كلمات محمد الحسن سالم حميد
نورة والحلم المدردح

هي .. أقيفن .. نورة فيكن
نورة نقاحة الجروف ..
نورة حلابة اللبيني .. للصغيرين والضيوف
نورة ساعة الحر يولع .. تنقلب نسمة وتطوف
تدي للجيعان لقيمة
وتدي للعطشان جغيمة
والمخلي الحال مصنقر ..
في تقاة الليل تندقر .. تدي لي باكر بسيمة
تكسي للماشين عرايا وفوقا إنقطع هديما
ما عرفتن نورة إنتن .. قولن إنتن شن عرفتن
نورة بت الواطة أخيتي .. نورة اخت كل الغلابة
نورة حاحاية الشقاوة .. نورة هداية الضهابة
الاراضي الياما أدت .. نورة بقت من ترابا
وماشي في الأعماق سحابا
مشتهنها .. والله جابا
للجنوب طبلاً يهدهد .. لي مشاعر ناس تعابة
وللشمال طنبور يسكت .. دمعة الميتين كآبة
ما عرفتن نورة إنتن .. قولن إنتن شن عرفتن
نورة عايز تقرأ قالت
فوقا حيطة الدنيا مالت
ختت الكراس وشالت
منجلاً صالت به جالت
لامن إنجرحت به شالت
للتراب فوق إيدا كالت
ومرة يوم في الدونكا لدغت
جاء الفقير بالليل حواها
ويوم ملاها الهم قطايع .. جاء البصير بالنار كواها
ونورة ما قدرت تمانع .. تقنع الناس المعاها
ومرة شافت في رؤاها طيرة تاكل في جناها
حيطة تنمغى وتفلع .. في قفا الزول البناها
في جنينة سيدي سمعت .. تمرة تصقع للوراها
الأرض لابد ترجع للتعب فوقا ورعاها
شافت النيل موجو لاها
الخليقة بقت إلاها
الشمس طبقت ضحاها
نار عقاب إنساب مكسر .. فوق تكليات متاهة
وضو من الله .. رهاب مكتف في وتيد الليل معاها
بين حضر بلدا وخلاها
فسرت للناس رؤاها
وقالوا جنت ومو براها
ونورة زادت فوق شقاها
وصدت الأيام تخش
تبني لي عصفورة عش
في السواقي تشوف عزاها
لما شوقا يسوي .. وش
تسقي تزرع
تسعى تصنع
للنهار في الليل تخش
عرفت الشقا والشقاوة إلا ما عرفت تغش
شايلة طولة البال من الله .. ومن أراضينا الإثارة
وماشي تكدح طول نهارا
وترجى لما الليل يفلل .. تسرق ألمي عشان خدارا
عشان صغارا
ولما ترجع لي ديارا
تنزف أحلام الفقارى
من عويناتا الحيارى
لي غبار الحال تقش
فوقو للآمال ترش
نورة تقعد صاحي تحلم .. بي بيوت بي نور ودش
وبالمحبة تشق دروبا .. ولي قلوب الكل تخش
نورة تحلم بي وجود
ما مشت بينو القيود
أفضل أفضل بي كتير .. بي وطن من غير حدود
نورة تحلم بي عوالم
زي رؤى الأطفال حوالم
لا درادر .. لا عساكر .. لا مظاليم لا مظالم
نورة تحلم .. ولما تحلم نورة ترجف
ولما ترجف نورة تحلم ..
ولما ريح الواقع المر .. لي عشيش أحلاما ينسف
نورة تنزف
ولما تنزف بالا يهتف .. يوم حا تنصف يوم حاتنصف
وتبدأ تحلم .. ولما تحلم نورة ترجف
ولما ترجف نورة تحلم
صاحي تحلم.. وصاح بتحلم
صاح بتحلم

من طرف **دمعات الندم** الأحد مايو 23, 2010 8:01 pm

وجيدة
قريب الله عبد الواحد

بعيد عني ..
خطاك ما لامست وجه الطريق ..
ومشيتي لا فوق غيمه لا ظني ..
كأنك من وراء صفحة زجاج مبلول ...
وراك الريح ..
وقدامك مدى السكة وندا المجهول ..
وأنادي ليك ..
وجيدة ... وجيدة
لا إلتفتي ولا لوحتي بي إيدك ..
وأنادي ليك ..
يجاوبني المدى الفاتح مدارج الهم ..
بتبقى وجيده طعنة سيف ..
موسدة في شق السماء المرسوم ..
وسادة دم ...
وتبقى إيدنا في إيديك ..
وفي شعرك ..
وفي المنديل ..

من طرف **دمعات الندم** الأحد مايو 23, 2010 8:03 pm

أغيب عنك....
أغيب عنك يضيع سر الحضور مني
يضيع فيني
شعور أني..أنا الانسان
وأكون بعدك وحيد وحيد
شئ تايه في سراب عالم
ورا العالم بعيد وبعيد
بلا زواده وبلا أمكان
وأغيب عنك
أشوف كل العيون ضدي
أشوف الكون صبح سرداب
بلا سكان
عدم لا ضل ولا ألوان
كانو لا انخلق لا كان
وأنا المصلوب
علي أبوابو طيف ذكري
ودليل عبرة وشهيد فقدان
وأنا المكتوب أغيب عنك
وأصبح في هوة الازمان
أنا المجروح
لغاية غاية الغاية
ولحد منابع الأحزان....

من طرف **دمعات الندم** الأحد مايو 23, 2010 8:06 pm

جمعنا قدر
عبدالرحمن مكاوى

تقول لى الفراق مكتوب ذى اول جمعنا قدر
وترحيل ياوحيد العين تخلى صباحى ليل وسهر
اقاسمك فى السفر بالروح
وسعيد انت وشقانى سفر
لما كتمت دمع الشوق
بكيت من غير دموع اكتر
زمان ماكنت قايلك انا ربيعك منو تحرمنى
والاقى الليل طويل عمرو
وعمرى الباقى من حزنى
طريتك قلبى علمتو عشان انساك...
علمنى
لا كان الفراق منك
ولا ياروحى كان منى
تقول لى الفراق مكتوب ذى اول جمعنا قدر
ترحل ياوحيد العين تخلى صباحى ليل وسهر

من طرف **دمعات الندم** الأحد مايو 23, 2010 8:08 pm

رعــــشة الشـــوق
محجوب الحاج

مرة بقصد احكى عنك

وقولى من طابعو البشارة

شوفو ديك القمرة بانت

والنجوم حاطت مدارة

غيبو اتلاشو فى عيونة

وغوصو فى اعماق مدارة

وابقو اعرفو من صفاها

كيف صبحت اسيرة هواها

وراسى فى ابعاد قرارة

***

الا لو مرات سرحت

وقمت لمحت وقرونى

وعرفو كل البينا عامر

اصلو باين فى عيونى

اعرف انو بحسن نية

باحت الاعين شوية

افشو سرى وغافلونى

واتعرف ريدك متاعى

وانو فكرى واقتناعى

والسعداة الضالة كونى

وبسالك يا زارتى عنك

والبراءة الفى عيونك

الرزانة الفى انفعالك

والضجيج الفى سكونك

انت ابعد من خيالى

ورعشة الشوق فى سؤالى

بتحكى عن ابداع محاسنك

وعفة الطبع البصونك

من طرف **دمعات الندم** الأحد مايو 23, 2010 8:12 pm

عجــــاج البــــحر
حسن بيومي

يراقصني عجاج البحر .. ترعد داخلي الأمطار
يكلمني تراب الأرض .. تشدو قلبي الأوتار ..
أغنيـكـــــــــم .. أغنيكـــــــــم ..
أغني جذوة النار التي فيكم ..
وألعن ذلك البرد المدثر روحكم ..
بـــــــــــرماد موتاكــــــــــــم ..

وأبني في عيون الشمس مملكتي ..
تنـــــــــاديكم ..
نسوراً تعشق الترحال في الأفاق ..
تبقى الكون حرية ..
فإن شئتم تعالوا الآن ..
نرقص رقصة البدء ..
ونعلم أن نمد الكف ..
نحو الشمس للدفء ..
تعالوا أيها الجوعى ..
تعالوا أيها الفقراء

من طرف **دمعات الندم** الأحد مايو 23, 2010 8:14 pm

غدار دموعك
كلمات والحان مصطفى سيد احمد

لا تنبش الماضى البعيد الم تكن
يوما لقلبى واقعا مجهـــولا
لا تنكأ الجرح القديم فإننى
و دعت ليلا مظلما و ثقيلا
وحملت روحى فى فواد نازف
ما زال يحمل نصفه مشلولا
وخلعت اثواب الحداد اما كفى
اذ صار قلبك فى الهوى ضليلا
............................
غدار دموعك ما تفيد
فى زول حواسو اتحجرت
جرب معاك كل السبل
وايديهو ليك ما قصرت
حطمت فى قلبو الامل
كل الامانى الخدرت
كلماتو ليك ضاعت عبس
لا قدمت .. لا اخرت
*************
ما كنا وكت الليل يضيع
تشرق نجومو وتنكتم
ويطل شعاع يكشف قناع
والظلمة ترحل تنهزم
وجفونا من طول السهر
تلبس وشاح فرقة والم
نستبشر اليوم الجديد
ونقول تعود انت العشم

كيف العشم وكتين يموت
والغصة تطعن فى الحلق
كيف الحنين وكتين يهز
لى زول بعيد ما بتلحق
كيف الرجوع لىزول قنع
شايل رماد(رفاة) قلبـو الحرق
سيب الندم وانسى الدموع
ما فات زمان ما بتلحق

غدار دموعك ما بتفيد
فى ظلمة ما بتعرف شعاع
اشباحة زى موج العدم
كسر المقاديف والقلاع
ونزلنا فى طوف الفشل
وابحرنا فى بحر الضياع
ونسينا ذكراك الزمان
عشناها فى زيف القناع

من طرف **دمعات الندم** الأحد مايو 23, 2010 8:15 pm

والله أيام .. يا زمان

ببكى وأتحسر عليك

وما بقول العشنا .. كان

وأرمى حبة لومى فيك

ولسة راجيك يا زمان

بحبة الذكرى .. المعاى

عايشة فى وجدانى .. جوة

ولسة بتدغدغ حشاى

يمكن الحبيتو .. مرة

يلقى فى كلمات غناى

فاصلة بتصحى المشاعر

ويمكن الطوّل سهادو

تغشى ليلاتو البشاير

ويمكن الفرح الزمان

لسة أصداهو .. بترن

غنوة حاضناها .. الضفاير

جايز الأيام تحن

وتصحى فيك نبل المشاعر

ويمكن المجروح يئن

وتغشى ليلاتو البشاير

ويمكن الفرح الزمان

لسة أصداهو بترن

غنوة حاضناها الضفاير

والله أيام .. يا زمان

من طرف **دمعات الندم** الأحد مايو 23, 2010 8:17 pm

الجالوص
عاطف خيرى

معتوقة ومعتقة ومنعتقة
نوافير إنتشاء وحشمة
وحَـمار العين ..
تضحك كلما وقعت مصيبة
تمشى على العجين وتلخبطو
وترطن إذا جاها الحنين
************
يا بت بيوت الهجعة كيف ؟
غبار شوارعك ماشى وين
زقاق يفتش فى زقاق
كتمة وضلمة وإنعتاق
أنا فيك لامونى المساجين
سكاتك منازل حلال الحرام
سكاتك على حين أهش الحمام
سكاتك عليك لما تصحى المسام
سكاتك عليهم سكوت و السلام
***************
صوتك وكت قطع البحر
قبال مراكب العمدة
ضهر النيل عرق ..
والشمس فوق حبل الغيوم
شرت جلاليب النعاس
ناشف غرب مبلول شرق
والمطرة زى شفع العيد
تدخل غرف كل البيوت
حكمة الجوع الشرح للأرضة
كيف تقرأ المرق قبال يقع
فوقـك سقف
إتنحنح الجالوص
أمرق على مهلك ..
مروق الحنة من ضفر العروس
واصعد على مهلك ..
صعود البذرة والروح والشموس
**********
مبنية مدن الخوف
من طينة آخر الليل
وانا فى سقالة الشوق
قدح البصيرة تقيل
فاتح زريبة الجوف
تمرق تخش الخيل
على كيفة كيف معلوف
ضهر المظنة يشيل
وانا ظنى ظنيـتـو ..
فى النيل غريق فى النيل
و الليل ولافى بالو ليل
ساكت يغنوا على القمر
واجعنى فى البحر السكات
سكتنى فى الوجع البحر
يا بت صباح الطير
وين البلد ركت ؟
ما عاد هواك يفتح فى الكتمة
شباك النزيف
وين تكيتك فى الغيمة شطيف النجوم
ريف الجسد صدرك سبلوقة اللبن الحريف
داسينى فيكى نضر
والأنبياء فاتوا
والأنبياء بين بين
قاعدين فى ضل النار
داسينى فيك نضر
فى غفلة جو الكفار
وطارت حمامة الغار
لاقونى ناشف ومر
ما ذنب جلد الطار
لو غنو بيهو شتر
ما تخافى الله معاك
وكل الملائكة سمر

من طرف **دمعات الندم** الأحد مايو 23, 2010 8:18 pm

زى ما يكون
قاسم ابو زيد

على عمقك مشيت متلفّحك .. خاطر
برغم ذبول نجيماتك سماك معقول
وشارع الشوق ..بدونك .. تمْ
بحِسْ بى القول .. على حدّ السيوف مجدول
ورغم الحاصِل المسلول فوق عمقك قدل جوّاى
على لقيا .. وبياض خاطر وزى مايكون
*****
على عمقك مشيت متلفّحك .. خاطر
لا شبورة .. لا ريحة الدُعاش مشبوبة بى ندّكْ
ولا ضوء صوت ولا برقت شموس منّك
ولا دخلت شموس فينى وما أظنّك بتدّى شموس
وحيطلع من عيونك ضى ولا طرد الجفاف خدّك
ولا ركّ الندى المحروق فراشات من شذاك .. دخان
شعاعات من بريق لحظك فهل يرجع زمن جيتك
حضور تانى ؟
على ذكراك أمل ممتد أنا وإنت .. وهدير الكون
على لقيا .. وبياض خاطر وزى ما يكون
**************
على عمقك مشيت متلفّحك .. خاطر
ولا عند المغيب وجت غصون شجرك
ولا رجعت طيور بتنم ولا زيف العشق مفضوح
ولا العمق القبيل مفتوح غنى الفرحه البتم القول
صدى الغنوات ... يرقِّص حول ولا دقت فرح بتلم
ولا رقدة .. تعب بتجم ولا وجّت رياض أطفال ولا الموّال
مركّب من نسيج الجيـّة من أنغام طبول شدوك
عشان أضحى الفرح مسحور وإيقاع الرقيص .. مكسور
نسيب لليل البلد ... ينجَمْ نطوى الشوق منام
نتوسد الأحلام على صحيان هبـّة نسيم باكر
لأننا نحن متواعدين انا وانت وهدير الكون
ومن جوّة الضجيج مارقين بصوت واحد
لأننا نحن متواعدين على لقيا وبياض خاطر

من طرف **دمعات الندم** الأحد مايو 23, 2010 8:20 pm

عباد الشمس
عباد الشمس شافك ..
مشاك ساقِك جبيرة وجد
تيار الظلام غطاك
غياب البهجة ما هزّاك
هواك هز العهود .. بى الصد
تذوب يوم الشموس ضوّت
عباد الشمس يوم جاك ..
سألنا الغيم عِنادِك ردْ ..
أسف بُعدِك حروف جفّت
جِدار الماضى .. دمعة خد
غَفل طرفِك .. صَرَخْ ياليل
سرق عِشقِك صباحاتى
شتيل إحساسنا ما فرهَد

من طرف **دمعات الندم** الأحد مايو 23, 2010 8:22 pm

ســـافر

سافر ..
مطارات الوداع ضجت
قدامك .. وراك بيضا
وسماك غنـّاى
مساحات الأسى الفى عيونّا
تتفجر مدينة وناى
بطاقات دعوة الرجعة ..
تساب عينين من الفرحة
دموع للحاضرين فجت
زغاريد غطت الدنيا
وعاد .. فرح الرجوع منية
صداك الريح ..
ومن السنبل الغناى
************
كتير بنعاتب الحاضر
ولا أسفاً على الماضى
صدق الرؤية من قلبك ..
بين الشوق وإنسانك
نغم فنان يعيش راضى
مداك إتعدى حد الشوف
دخلت على الشعر .. إنسان
هواك .. إتختّ جوة الجوف
وإنتحر النهار .. هسـّة
نغنيك لى مدن .. شاخت
معاك أحلامى .. ما تنسى
تغنيك القرى الراحت
خلاص يا غربة .. ما ترسى
غنيناك .. وبنغنى
وبتحدى الزمن .. فنان ..

من طرف **دمعات الندم** الأحد مايو 23, 2010 8:24 pm

طيبه
محمد الحسن سالم حميد

كل ما تباعد بينا عوارض
كل ما هواك يا طيبة مكنِّى
تلقى الغربة تكرب الواحِد
بيكى أسمى الشوق .. وأكنـِّى
لمـّا أفوتك من دون خاطر
أو دون خاطر منى تفوتى
بلقى حبايب فى كل حِتـّة
وكل بيوت الفُقرا .. بيوتى
لا غيرت وراك الجِتـّة ..
لا بدلت ملامح صوتى
لا غافلنى وهادن فنى ..
غامل المدن .. الما عِرفتنى
دقن الشوق الصبرو .. مصوبر
للأرياف الكم .. وفّتنى
وللأطفال الناشفة ضلوعا ..
ونازفة بغنى
أطمن روعة .. وأهدّى دموعة
لبسمة بكرة اللاّها تمنى ..
ولا مصنوعة
للاطفال النازفة ضلوعة وناشفة بغنى
********
أغنى لشعبى ومين يمنعنى
أغنى لقلبى .. إذا لوّعنى
مخيـّر دربى الما رجعنى
إذا طلعنى دخلت القرب ..
ولا الغربة الكدروبية
تنزل غنوتى بى قمرية
أو وقـّعنى فى بطن الجـُّبْ
بطلع يوسف بالأغنية
***********
أغنى الناس الما بتسمعنى
المِنِّى بعيدة .. ومبعدة عنى
ا نادى نشيدا .. وكنت المعنى
الإيدى فى إيدا .. وإيدا بتبنى
فى دنيا جديدة اليوم .. راح تدنى
حسيس طنبارة .. مع نـُقارة
صفِقتاً حارة .. ودارة تغنى
فيا حلتنا عليكى تـُرابك ..
وإنتى شبابك زينة الجَنـِّى
أحلى عروس البلد اللّتنا
ولاّ الغُبُش الرّابّة تهنى
ولاّ هدير المدن التصحا ..
وتمحى ظلام الحاصل .. عنـّى

من طرف **دمعات الندم** الأحد مايو 23, 2010 8:29 pm

صديقى الاول
مصطفى سيد احمد

يا صديقى الأول بان فى ود سلفاب
لغز لا يتأول... جمال وكمال
كنت ناعم بال قلت اروح اتجول ..
أقتل اللحظات فى الشباب اتغزل
فجأة والإدراك فى خاب واتعطل
لما دون انزار شفتو غز ووغل
شاف على ذهول وجهو بش وهلل
قال صباحك خير ..قلت أحلى وأجمل
جمــــــال وكمال
قال تشرف لو فى الديار تتفضل ..
قلت ليك شاكرين يا كريم المنزل
جمـــــــال وكمال
أرخى طرفو وفات والمزاج إتبدل
خلى طرفى يجول والرباط يتحلحل
حكمة يا ابراهيم كل جمالو مكمل
شك سهمو وفات صاب قليبى الأعزل
ليلا بوبـا وطال
القديم مدبـور والضمير يتوسل .
عل ردفو يطيع والصدير يتمهل
الوريد مبروع فوق كتيفو مهدل ..
والصدير عوام زى سحابا رحل..
جمـــــــال وكمال
ليلى بوبا وطال حاكا ليلو المسدل ..
واضحى نومى خدار فى خيالو تغزل
وصفو حورى جنان فى فريقنا اتنزل
مابقول دا فلان والحديث إتسلسل

من طرف **دمعات الندم** الأحد مايو 23, 2010 8:31 pm

سفر العــــــمر

ما بان عليك سفر العمر
لسة الربيع يا دابو زار
لسة الضفاف المترعة
بتفيض ندى وتطرح ثمار
وأنا جوة قلبى المشتهيك ..
نزفت جراحات الودار
الناس عليك ناداها فال
فى عيونة نام الازدهار
***********
يازهرة طالت بالفرح
بتراقص أنوار المساء
ما بان عليك أثر القطاف
ولا جاتك أيام القسا
ما اروعك وانت الشباب
وانا جوه قلبى المشتهيك
نزفت جراحات كل بيت
جوه العيون أطفال فرح ..
لمة زفاف..
جوه العيون تشرق شموس ..
يرحل جفاف..
ازمان بتغرق فى النعيم
وحنان غمرعاشقين رهاف
وأنا جوه قلبى المشتهيك ..
نزفت جراحات الودار

من طرف **دمعات الندم** الأحد مايو 23, 2010 8:33 pm

الامانى السندسية

مهما فيك طولت صابر
يا سنين عمرى الشقية
ومهما طال فيك حظى عاثر
وذوبت عمرى الاسية
ما بقول انا راح أوانى
عارفو ببسم لى زمانى
وسعدى برجع ليا تانى
بالامانى السندسية
بالامانى السندسية
بكرة بصبح ذكريات
حالى داك الكنت فيهو
تملا آمالى العراض
كل درباً اقـتـفيهو
بكرة تجمعنى الظلال
بى عزيزاً اصطفيهو
ترجع ايامى النضيرة
بى لياليها الهنية
وسعدى برجع ليا تانى
بالامانى السندسية
اصلى من فيض العواطف
ديمة أسراني المحنة
وكل مناى ترتاح حروفى
فى فؤاد طاوياهو انة
لا فؤادى يشيل عداوة
لا شقاوة ولا مظنة
اصلى يا روحى الصفية
لسة حافظ للوصية
وسعدى برجع ليا تانى
بالامانى السندسية

من طرف **دمعات الندم** الأحد مايو 23, 2010 8:35 pm

السحاب
يحى فضل الله

السحاب لو اصلو
خاصمنا ... و تعب
و الرياح الفي الدرب
شتّتتْ فرح القوافي
و بّددت حزن المنافي
مددت بعد المنافى
برضو ريدك فينا باقي
ريدك انتى فينا باقى
في الحنايا ..وفى الزوايا
في عيون أطفال بتكتب بالدوايا
في المشاوير والحكايا
و جّوه ثابت في القلب
يا سمحه ما غابت مدينة
يا سمحه ما بموت الفريق
و لابينهش في غناوينا الحريق
و الوتر دايماً بغني ..
للقوافل الجاية من وجع الطريق
و السحاب برضو بيعود
ويجينا بي بريق البشارة
بينا بينك لا موانع لا سدود
بيناتنا بس تبقي الجسارة

من طرف **دمعات الندم** الأحد مايو 23, 2010 8:37 pm

اســـتلاب
الاستاذ يحي فضل الله

خبرينى
والمساء الشاحب الخطوات
يحترف التعب..
ورحيل أغنيةٍ توشوشُ
فى خبايا الإنتظار
تضيع منى
كيف بددنا الكذوب
فى انتظارك بالكذوب
ثم إنّا لم نعد ندرى بأنا
مذ حملناكِ .. جنينا
قد نسينا أن نضع فيه الملامح
كى نحدد ما فعلنا بانعتاقك
لو سـُئلنا كيف ضيعنا
إنبهارك بالخصوبة
وأرتضينا أن نسلم للعساكر
من ثمارك ما يطيب
كى اجاذب كل أطراف الزمان
أهدهد الكلمات
لا أقوى على شىءٍ من الذكرى
وهذا العقلُ متعب
رجوع الدرب .. لا يفضى إليك
ولا إلى اللغةِ الصريحة
كى أحدد ما تبقى من رحيقك
فى مسام الروح .. والجسد إشتعال
وهذا النبض .. أتعب
*********
وتلك الخطوة إبتعدت
عن الصحو المكمِّل للحقيقة
أغلقت بالخبث أبواب الوضوح
زيفت صوت المغنى
عهرت لغة النشيد
ضيعت حلم الصبايا ..
فى طوابير الرغيف
غيبت حلم الطفولة
أنهكت حزن الشيوخ
همشت منك .. القضايا
فى إحتمالك للتواصل
والمرابون إستباحوا
هذه الأرض الحلوب

من طرف **دمعات الندم** الأحد مايو 23, 2010 8:39 pm

الخلاص

طال ما بحرك فى مى
وتمرك مفدع بالجريد
شدرك أمد حدّ السمى
طينك معتـق بالطمى
نبنيك أكيد .. نبنيك هوى
نبنيك أيوه سوا .. سوا
من أوجديد نبنيك جديـد
ياإيد أبوى على إيد أخـوى
على إيدى انـا
على إيد و إيـد
تجدع بعيد فى اللجة
فى من راس ميضنة
حيكومة الفقر الدمار
الكضبن و الصهينة
اللى نقاص أيامنا كاس
اليالطيف سوس البحر
نرجم قفاهو حجر حجر
من ها الرصيف
الما قدر قدام
سريحة الموج يقيف
الما انستر
الارزقية وناس مو يا
نسقيها كاس أسقتنا يا
نوريها كيف عشق الحياة
سنانا فوق حجر القصاص
سوانا ناس ارض البحر
جوانا حد من الرصاص
يا ضو حبـيبـين القسا
طول ما انت غرقان فى الأسى
تبت يدين ما ترمى ساس
ما تبنى مجدك من جديد
تفتح شبابيك الخلاص
تدخل نسيمات النشيد
بيت القصيد يستقبله مستقبله ..
و الحاضر الماضى التليد
يابلدى يافردة جناحى التانى
وكت الناس تطير لى عالمه
وآ وجعة الزول البيجيك
ما يلقى فيك غير الهجير
ناسا تواتى مسالمة
كل البشاشات القبيل
يلقاها ميته مسممة
والجاته جاته من الأرض
ما جاته من تالا السما
ما أعتى غبنك يا ولد
وأعدل قضيتك وأعظمة
لاترجع السيف الجفير
والدنيا فايره مصادمة
من غير تجيب تار البلد ..
ريح العوارض تهزمة
تطرد مع ابليس الأخير
دعة الضلال من جنتك يا آدمة
تاكل من الشجر الحلال
يغشاك نعاس فى ضل رمى
تختاك هضاريب الصعب
كربة ليالى المظلمة
يانيل قبل خاطرك يطيب
أرضك تفزع باللهيب
تكشح تواريب الغضب ..
صعب المراس ..
نوبة و زنوج و بجة و حلب
رطانه عربان مو أشو
ومولدين تلقانا أو نلقاك ضوء
ظلمة لياليك العجاف
رشه نهاراتنا النشاف
آمنا بيك وموحدين
فى إيدنا فاس وقلم رصاص
شتلة و كمنجة و مسطرين
و طبنجة فى خط التماس
حراسة من كيد البكيد
ضد الرصاص والانتكاس
نبنيك هوى وأشد باس

من طرف **دمعات الندم** الأحد مايو 23, 2010 8:40 pm

البنت الحديقة

حتجى البت .. الحديقة
شايلة أنسام فى طريقا
.. وشاتلا ألوان
حتجى البحدث بريقا
ضجـّة الضو فى المكان
حتجى المن بدرى جات
من ظلامات السكات
شايلة قمرين فى عيونا
وفاتحا ليلين بى جنونا
وطاوية ساحات إنتمت لى فجر فات
وتنتمى لى عصور جديدة
حتجى البت البريدا
ضاحكة .. منتصرة .. وعنيدة
آملة .. مزدهرة .. وجديدة
ناقشة فى الزول .. أغنيات
حتجى المن بدرى جات
.. من ظلامات السكات
واصفة لى الناس الطريقة
ولى العصافير .. الجهات

من طرف **دمعات الندم** الأحد مايو 23, 2010 8:42 pm

يا خطوتــك
يحى فضل الله

لا زمن حبك حقيقة
لا تعب زمنك فرح
لا دغش وترك صدح
لا بعد ليلك صبح
يا خطوتك ... يا خطوتك
يا خطوة الوجع الجرح
لا الفيها منك ابتدى
لا البيها منك انتهى
يا خطوتك يا خطوتك
يا خطوة ضاعت
بين صراخك والصدى
بين المسافات والنوى
بينك وبين كل المشاعر
الفينا غرقت فى الغنا
يا خطوتك يا خطوتك
يا خطوتك داست على
الحرف اليبس فوق الشفاه
داست على البوح والكلام
داست عليك
على انتظارك والملام
داست عليك
على الدروب الماشة منك
وجاية ليك
لا فتر فيها الولف
لا سكت فيها الحرف
يا خطوتك .. يا خطوتك
بين ابتعادك وانتظارى
بين مشاوير طفلة ضاعت
بين عيونك وافتكارى
يا عيونك وافتكارى
يا عيونك وافتكارى