حاجة فيك الاستاذ:هاشم صديق

من طرف الحكيم السبت أبريل 11, 2009 9:12 pm

حاجة فيك
الاستاذ:هاشم صديق

حاجة فيك

تقطع
نفس خيل القصايد

تشده أجراس المعابد

توهتني .. جننتني

جننت حرف الكلام

وبرضو آدتني السلام

********

حاجة في شُرف المداين

وفى غرف كل السفاين

جوّة في عمق المناجم .. والعيون

حاجة زي ما تكون محلـّق في العواصف

فجأة .. تهبط لي السلام

حاجة زي نقر الأصابع

لمـّا ترتاح .. لي الموسيقى

حاجة زي أخبار .. تناغم من
جريدة

حاجة زي وتر المواني

لمـّا يصدح لي سفينة

.. حاجة فيك

*********

حاجة فيك

لا بتبتدى .. لا بتنتهى

خلتني أرجع لي القلم

وأتحدى بي الحرف .. الألم

وأضحك مع الزمن .. العريض

وأنسف متاريس الطريق

وأعرف متين أبقى المطر

وأفهم متين أصبح حريق

.. حاجة فيك