مكتبة اغاني الشوايقة

من طرف **دمعات الندم** الخميس يونيو 24, 2010 7:35 pm

لسـان الحال
ك/حاتم حسن الدابى
غ/جعفر السقيد
الكاتما فى جـواى كتيـر متملـك الجـوف والعصـب
وما كت دايرة أقولو ليـك لكـن لسـان الحـال غلـب

ما بنسى يـوم ودعتنـا وسافـرت فـى غـرة رجـب
خليـت وراك الـدار حزيـن يتباكـا والدمـع انسكـب

أعذرنى والله العظيم لو ما الضـرورة أنـا مـا كتـب
وأنا خايفة فى بعدك يكون الضاع هو ضعف المكتسـب

اليومـة داك نـاس البلـد هنونـى شايقيـى وعــرب
قالو لى مبروك خير وجاك يكتـب سلامتـو الإغتـرب

قالو لى دوب نجم السعد طلاكـى مـن بعـد إحتجـب
يا دوبـا بالـك يستريـح وتنسـى العذابـات والتعـب

فضّلت أحسب فى الشهور قاعدالى فوق نيـران لهـب
صابرة وحريصة على العيال لا بيقو للريح فى المهـب

سديت خانتك من مشيـت قايمابـو واجبـى كـأم وأب
والأسرة يضنيها المسير .. وتتهاوى لـو مـا فيهـا رب

والله مـا بنكـر جميلـك برضـو لينـا ثنـاك وجـب
موكب هداياك ما انقطع .. كان سترة فى الزمن الصعب

لابسين وماكلين والنعيم كايلنـا فـى يـوم مـا نضـب
وعايشين معيشة المترفين .. طولنـا والطبـع إتخـرب

البيـت مفـرش بالحريـر ومليانـة إيـدى بالـدهـب
لكن خسارة على محل .. عاش سيدو خمسة سنين عزب

الشى المهم ما قلتو ليك وليهو إنت مـا ظنيـت حسـب
كبرو الصغيرونين خلاص .. خايفالـم الطبـع الكعـب

وصولوها مرحلة الخطر .. والأمـن مـا زال مستتـب
وانا كتّ قادراهـم زمـان لكـن بعـد كبـرو اتغلـب

حصلنى قبـل الجـد يفـوت .. دوبنهـم فـوق العتـب
قبال نحصد الخير ندم .. ومابيجدى كان لمـت وعتـب

خايفالم الطيش فى الدروس .. ومابرضى لو واحد رسب
خوفنـى المتعبنـى الكبيـر بعديـن يمرقـو بـلا أدب

وريتك الحاصـل علـى لا فيهـو ثـورة ولا غضـب
شان الحديـث مايبقـى نـى والواحـة يكتنفـا الجـدب

أنا قلبى مازال لسة حى .. ونجمـو الملاهـج ماغـرب
وآخر كلامى تـرد علـى لا أبقـة بكـرة أنـا السبـب

من طرف **دمعات الندم** الخميس يونيو 24, 2010 7:37 pm

رد أغنية لسان الحالأنا ما كنت داير الاغتراب ..
لكني مجبور ابتعدت
حسيت متل غمز الحراب...
وفي أنه الصبر النكد
أرجع وأقول إنتي السبب..
قلتيها لي ما بترضي بي عيشة وسط..
دايرها فوق عيشة رغد
قاريهو في عيون الصغار..
طلباتم الما ليها حد
حسيتو في عيناك سؤال ...
احترت ما لاقيلو رد
نظراتك الحادة النبال..
سيطان بتلهب في الجسد
وانا كنت صابر زي بلال كان ردي ليها أحد أحد ..
.

الكاتمو في جواي كتير من حرقتو الجوف اتهرد...
ما كنت قاصد أقولو ليك لكن لسان الحال سرد
...ز
ما بنسى يوم ودعتكم وبي حسرة غادرت البلد
ختيت على جرح الفؤاد ..
فُرق البيات والولد
ما اعتدت أفارق للصغار..
والوجعة فرق الفي المهد
زفر القليب آهات حزان..
حسيتبو جواي ارتعدت
كان انتي شوقك لي بحر.
. كيفني انا المكتول كمد
خليت لك الروح والقلب..
سافرت بي باقي الجسد

عارفك حريصة على العيال..
فوقك بعد الله اعتمدت
في الحارة تسوي لك رجال ..
للمايلة والمحتاج سند

اتغشن القالن وراي..
هلن لي نجمات السعد
ما اتغربن وضاقن معاي .
.مر عيشة الهم والنكد

لو عني كررتي السؤال ..
أنا بني وبين الفرحة سد
سهّيت وغايتو علي حال ..
يعلمو الفرد الصمد

عزّابي في قاطوع صغير..
في ضيقو زي ود الأحد
في السوق صباحات الله خير ..
حايم وازازي بلا غرض

الزي بيهو الليل يطول
يتقلى فوق جمرو الوقد
اتوقعي البجي ليك يقول.
. في الغربة محبوبك فقد

البي ده ما بيغباهو زول..
يحكيهو طرفي الما غمد
سنتين افتش في كفيل..
لي حالي فد زول ما نشد

في التالتة رب العزة قال..
حامدنو حلال العقد
مكتب ولا كان في الخيال ..
في الفارهـ الدور قعدت

عربية والراتب كبير..
ورابطلي خرزة من الحسد
بليت عروق قلبي المرير..
عِزة ورفاهية وسعد

لكني يا حظي التعيس..
تميتلي شهرين واترفدت
قالوا الوظيفة اتعممت..
محجوزة لي أهل البلد

شوفي الضرايب فوقي كم ..
كان جيت أفكر في البلد
وزي الكلام ده يزيدني هم ..
ويرفع لي إفراز الغدد

قوليها لا تهابي الحروف..
كان في غيابي الشوق برد
البي ده كلو من الظروف..
والله ما لي فيهو يد

اليبقى في فرش الحرير..
ماخدنو من فك الأسد
بي ضحكة في ابواب جحيم..
لي دمعة اتبلابه خد..

أنا شان رضاك أرحل بعيد..
لي غربة لي دمعة وسهد
وأنا فيها ساهي البال شريد..
أفكاري فيكم وفي البلد

سامحيني لا تابعي الظنون..
ما زلنا بيناتنا الوعد
والغربة من أجلك تهون ..
وطعم العذاب يصبح شهد

جوابك الظاهرو الوداد..
كاتباهو بي دمع الحرد
يجي ردو في نفس المعاد..
نتلاقى طيارة الأحد

الكاتمو في جواي كتير...
من حرقتو الجوف اتهرد
ما كنت قاصد أقولو ليك لكن لسان الحال سرد

من طرف **دمعات الندم** الخميس يونيو 24, 2010 7:38 pm

فــراق قلبيـن
ك\ ياسر علي بشير

بعد اتفرقو القلبين واتيتم غرام وحنين
زمان كان الدريب واحد .. حلينا بقينا فى دربين

قبيل كشح الوصال ماروق وراالشيل التقيل وقع
غدرما شهد المسيوق ولا الفطن التراب لسع
يا حليلك يا زمان الشوق ويا اروع حلم ودع

حرام ما الريده بين سنين ومن دابناالصغار شفع
وكت اتصفح الايام .. بخصم قلبى لا يدمع
واقولو اصلو الزمان دوار والراح تانى وين يرجع ؟

رحل ما خلى غير تزكار مكتوب بى السواد صفحة

ضميرك خدروهو الناس بعد فوت الاوان يصحى

وانت حاتل فى بطون الصى يجيك محل الندم نفحه

تقبل وين يتاورك ماضى مهما خنتوا ما بتمحى

حليلنا بقينا فى دربين وخلينا الحنين مذهول

احتار كيف يدارى البين ونمرق من مصير مجهول

لكن يا حنين الحاجى فى دابنا الدريب بيطول

ولا تضهب وحاتك البينا .. نحن البينا مات مقتول

خلاص اصبحنا فى دربين ويقن حادى الدريب يوم فات

بعد ضاق المراير كيف يتلمو اللي صارو شتات

سعادتك لو تمن للفرقه .. بدفع عمرى لى الشمات

وليك اتمارى وين ما تبقى ياظالم حقيق ما مات

من طرف **دمعات الندم** الخميس يونيو 24, 2010 7:44 pm

حقك على
ك :السر عثمان الطيب
حقك علي .. واللوم علي ..
طالب السماح والمعذرة ..
صفيلي قلبك بالرضا .. والعفو عند المقدرة
لما الحزن فاض بي ودفق .. والهم طواني واعترى
غير قصد اني جنيت عليك .. ولساني زلّ وافترى
غامرني احساس بالندم .. مسخ حياتي وكدرا
في جوفي زي سماً زعاف.. بي غفلة يكتل بالضرا
الغنية مارقي من الضلوع .. أوزن ربابتي واطنبرة
ملياني بالاسف العميق .. عذب ضميري وفي سرى
عينيا اكتحلت أسى .. سهراني جافاها الكرى
دمعاتة تتجمد تقيف.. حد شوفها ما فات محجرا
يا المني شان خاطر وفاك أردع هواجسي وأزجرا
واتحاشا فيك لغو الكلام .. دايما خواطرك اجبرا
ما البيني والبينك .. متل حن السحاب الممطرة
البينا والبين الودي ..ما عمرها انفصمت عرى
رضياني ينشف ريقها من طول الرحيل والدردرة
من دمعها النخلة ارتوت ..واتمطقت طعم الترى
رضياني تفني وتنعدم مطعونة وسط الخاصرة
تتلوى تتحرقص برق .. شق البوادي ونورة
يا روحي قمرية هواك .. أنا لي تقاتي بدودرا
ولفتها ومديتلها بي كفي ...عيشة وسكره
لو وشوش الريح في الغصون بدد آمالها ونفرا
بي ريشة ريشة وبالصبر ..بابنيلة عشها في الضرة
بحق من خلق الجمال .. ورسم المحاسن صورا
انا رائي فيك نقا الوجود ...قدامي انت المنضرة
سواك الله مليكة فوق عرش القليب متحكرة
ختاك بين درر العفاف ..تتلالي في التاج جوهرة
انا ما بنتقص حنك علي .. لا يوم مشاعرك بانكره
حفظ الجميل والامتنان .. طبع النفوس الخيرة
اصلو المشاعر ما بتدوم ..لو عايشي بالغش والكرا
والريد دروب ما ب يتمشن .. لو خطوة الزول لا ورا
خطواتي لا قدام عليك .. ما اتعبها السير فترا
عجلاني لو تقدر تطير ليك .. كل ما الشوق تاورة
لو تاني يوم اغلط عليك .. بي كلمة جارحي مؤثرة
إن شاء الله ..يا نور العيون .. انا جرحي لا طاب لا برا
إن شاء الله .. يا نور العيون .. أنا جرحي لا طاب لا برا

من طرف **دمعات الندم** الخميس يونيو 24, 2010 7:45 pm

قصة عمي الامين العندو ولد واحد اسمه عمر والولد ده
شغال في العسكرية وتم نقلهم الي لبنان للمشاركة في قوات
الردع ولكن كان لعمر راي اخر وهو انه لايمكن ان يقاتل
اخوانه في الدين وعلية امتنع عن المشاركة .
فتم ارسال برقية الي القيادة العامة بالخرطوم من خمسة كلمات
وهي :-
( الجندي بالرقم اربعين - عمر الامين - استعفي من خدمتنا )

وعند استلم البرقية هنا بالخرطوم حدث خطاء فتم استلام البرقية
كالاتي :-
( الجندي بالرقم اربعين - عمر الامين - اتوفي في خدمتنا )

يعني ( استعفي ) استبدلت الي ( اتوفي )
وكانت نتاج هذا الخطاء موت انسان وهو العائل الوحيد للعم حاج الامين
و نتيجة صدمة الخبر الحزين شبة شلل للعم / حاج الامين
الي ان وصل عمر بعد مدة من الزمن وهنا كانت المفاجاة
للكل .
وبداء عمر يحكي في القصة والحمد لله تعافي عمنا الامين

الغلطة فى كلمه وحرف
كلمات وراق المجزوب
لحن واداء معاويه المقل

الحلة فى امن وامان
ناس البلد فى عيشتن زى عادتن
بعد الصلاة وشاى الصباح
كل زول مرق لى شغلو راح
الراح على الدكان فتح
والساق غنيماتو وسرح
الشالو طوريه ونزل
لى شغلو ما قام فى كسل
والشالو منجل دار يحش
للفى المراح والده الجنى
وللدار يبيعا تمصرفو
ودون السعيه يسمنا
ناس البلد فى عيشتن زى عادتن
حتى الصغير الفى المدارس فى المواعيد قام مشى
فى ايدو خرتاية كتب حاشيها كراسات حشى
وفى التانية كورية الفطور بى كسرى بايته من العشى
الاهلو حالن منصلح عاسولو قراصة قمح
واليوم يمر يتعدى فى ايام الزمن
ساعة المغيرب كل بيت اتلمو اهلو على صحن
فيهو الزلابيه يقرضوا وفى ايدن الشاى اب لبن
شاى المغيرب فى البلد يتعدى من ضمن السنن
مر الوقت فى سراع مشى
وفى الخلوه اذنو للعشا
حاج الامين اتناول السبحه ومرق
لاقاهو عند الباب حمد
شايلو تلغراف معنون بالاسم حاج الامين
وكان فى وشى حمد اضطراب
وفى راسو مية سين وجيم
يمكن يكون جاك من عمر
ياجايى يارسل مصاريف الشهر
حاج الامين هز اصبعو وقال
ياعاشه جيبى اللمبه جاى
انشاء الله خير من جناى
فتحو وقراهو وفى الواطه غز ايديهو وقعد
عمر الوحيد ياعاشه مات - مات ياحمد
وطق السكاليب فى البلد
محمد سعيد جاهن برا قال لاتقولوا عمر مشى
واصبحنا نحن بلا ضرا كل البلد ليكن ضرا
لو كنتوا دايرين اى شى لاتخلوا غيرى يكون وشى
خلونى ليكن اكون عمر ودكانى لى حاجتكن ضهر
سالت دموع حاج الامين واستغفر الله العظيم
وكان القطر قطر كريمه زى عادتو متاخر وصل
وناس البلد فى الحله كلها كانوا متلمين على حاج الامين
جمعا غفير بينن بصير خاتلهن نار جنبهن
دايرين شرارا يطق يطير
كل القصد حاج الامين يكوهو فوق كرعيهو كان يقدر يقوم
وفى اللحظه ديك الباب نقر
ودخل عليهم زول عليهو اثر سفر
كانت ملامحو وشكلو كلها زى عمر
وكتين جا ماشى على الخلوق بينن ظهر
ياهو نفس الزول عمر
بعضن جرى والبعض زحزح لى ورا
لكن عمر قال قولوا بسم الله - مالكن يالاهل
انا فيكم اتلوم حصل - قالولو لا لا ياعمر
لكن جا تلغراف وليهو اسع شهر
قال انت مت واندفنت غريب وطن وغريب اهل
قال اسمعونى عاد اوريكم شنو ياناس الحصل
ساقونا من الجيش جمع ودونا قوات الردع
لمن وصلنا نزلنا فى لبنان ما شفنا الامان
ايوه صاح انا قلت لابحارب لابضارب لابحمل سلاح
اخوانى فى الدين واللغه اخوان مصير اخوان كفاح
انا جيتا بينن للسلام
وكتين خلاص البى عرفو انا جيتا بينن للسلام
كتبوه تلغراف شديد اللهجه قام
كان خمسه كلمات-كان زياده معنون الخرطوم قياده
الجندى بالرقم اربعين عمر الامين
استعفى من خدمتنا فى لبنان
واستعفى من خدمتنا وصلت للقياده اتوفى فى خدمتنا
الغلطه فى كلمه وحرف كتلتنى قبل اليوم يتم خلتنى عايش بالاسم
حاج الامين كب نطى من العنقريب وقالد عمر حبو الحبيب
وصبت دموع الفرحه من نبض القليب
كل العلى كرعيهو زال
قادر الله الحكمو مابيعرف محال
طقت زغاريد الفرح
وناس البلد فى الحله كلها لانام صغير لانام كبير قضوا ليلن فى فرح

من طرف **دمعات الندم** الخميس يونيو 24, 2010 7:46 pm

سفر الامل
غ:البركل
أنا أخترت من بين العيون ياغالية عينيك أعشقا
وأخترت شوفتك كل يوم لو حتى شوفتك أسرقا
لكني مالاقي الفرح لا في البعاد ولا في اللقاء
وما من هواك .. أنا أصلي عاد خلقوني من طين الشقاء
مديت كتير حبل الصبر لامن فقدت أنا أولو
ومن غير صبر بقدر أساي ياغالية شانك بحملو
بس لو سمحت ومرة بس داير قليبك أسالو
حافظ معزّتو زي زمان ولا الحصل كان بدلو ؟
والله يا نور العيون أصعب سفر سفر الأمل
تلقاك تعاين في الهدف .. وما داري أنت متين تصل
كل الدروب جربتها وسافرت فيها عشان أصل
وفي كل مره الف وأعود من تاني لي نفس المحل
سيبي العواطف ديك بعيد .. وأنسي ريدك وقولي لي
أيه الفرق لو زول زرع أمالوا في أخصب ودّي
والتاني روح للبعيد وأختارلوا يا محبوبة صيّ
حايحصد الأول أكيد والثاني زي حالتي العلي
ولو جيتي تسألي عن هواي بالله أسالي عن هواك
تلقي الجواب نفس الجواب ماقلبي يادنياي معاك
أرجوك أوعي تفكري أنو قلبي يصبح لسواك
لكن لو فقد العشم يمكن أقولوا خلاص كفاك
أنا عارف المواجع لي براي أنا طول سنيني أبكي وأنوح
فقدت أحساس الألم ياروحي من كُتر الجروح
ومابلقي عارف فرحتي غير فيك يا أم وجهاً صبوح
وكفاية كل القلتو ليك .. أنا تاني مابقدر ابوح

من طرف **دمعات الندم** الخميس يونيو 24, 2010 7:47 pm

انا المأساتى ما بتتقال

غ / عبدالرحيم البركل

انا المأساتي ما بتتقال بقيت احسب عميري الفات
عزب لا حفله لا شبال
لقيت الـراح كتيـر وكتيـر مـرق لا زوجـة لا اطفـال
ترانـي فـى مهـب الريـح مريكـب لا فحهـا الـشـلال
بقيـت مسحـور عيونـك ديـل اتحجـر بقيـت تمـثـال
وافتـش فـى مكانـك ويـن لقيتـك فـى قليـبـى هـنـا
انا الجرب مآسي الغي تعال شـوف كيـف حفـن كرعـي
وانـا اتبشتنتـا يـا خـلاي فـوق درب الفريـع الـنـي
بقت لى مع العيون قصـة مخلفـة فـوق جروحـى الكـي
خيالـن مـادوام نافـر يحلـق فــى خـلاهـو الـصـي
ولا قـادر افـيـق وارجــع ولا قــادر ادارى الـبـي
واشوف غيمك انا العطشان واقـول هسـع يجينـي الـري
وافكر فى امـور الحـب وادور فـي ساقيـة غيـر معنـي
يـا حليلـى انـا حليـل ايـام سعادتـي معـاك وكــت
كـان الزمـن بـسـام يـشـاور لــى دوام ضـحـاك
يضمنا كان هدوء الليـل هـو لا حـس همسـة لا كـوراك
لقيـت يـا قلـب زولـك بـعـد وجـعـك لقيـتـو دواك
اتاريهـو الزمـن دولاب قسـي ورجعنـي الـف سـنـه
طريـتـا انــا طـريـت السمـحـة بـيـن اهـلـهـا
وكت تنـزل وكـت تطلـع مـع الحـوب يجتمـع شمِلهـا
تـمـد ايديـهـا للمنـقـة تـداعـب للجـريـد قبلـهـا
وماهماهـا زولا فـات يقاسـي الغـربـة مــن اجلـهـا
ماخلانـي ابتليـت بـي ريدهـا افتـل فـى حبـال رملـه
كمان خايف الجنون يحصـل تفـوت عقليتـي بـى قبلهـا
بوريكم مآسي غرامي عشتها وعمرى كان تمنها
وانــــا الـمـأسـاتــى مـــــا بـتـتـقــال

من طرف **دمعات الندم** الخميس يونيو 24, 2010 7:48 pm

حُبي الفقدتو بعد وَفاء

حُـــبي الـفـقـدتو بعد وَفا عَكَّر لي جَوِي بعد صِفا
وصِـبـحـــــــت ســعــــــــــــــــادتي مـــن المُحال
جَمري القديم ما كان كَفى موقِد يَلهـلِب وما انطفا
جَـــــــــات تــــــانـي هَـبــَتـــــو ريـــــــــــح منال
ريـــدنـا الزمان مالو اختفى مالا المودة بِقَت جَفا
ريــــدًا انـــت عــــارفــــــــــــــو حُـــلـــو وحَلال
الـبـِت دي وين كت شايفا أو مَرَّة واحده مَصَادِفا
يــا صــــــح تـــقـــــــــــــولـو سـمـعـنـــــــــا قال
رُوحي المـَشَـحتَفة عارِفا مالا السِّيرة بِقَت تَخَوِفا
شـــــــــــن دار يـــكــــــــون سـبــبـا غير الجمال
مـسـكــيـني فـاقِـدي عَـواطِـفـا عَشمِاني فيك تَوالفِا
راجــــــــــــاك تـَجُـــــــــــــــــــــودلها بالوِصَال
قلبي العليل كايس الشِّفا لو شِلـتو في حُضنَك دِفَا
كــان بـالــــســـعـــــــادة عِـــمـيــــــــــــري طال
قَدَمِي العليك سَاسَق حِفا هو بَراهو حَالتو يَوَصِفا
يـَغـــــــــــــنِي الـبـيــشـــوفــــــــــــو عن السؤال
غــالـبــــــني حــالتي أصنِّفا وِشِّي وقَفَايا بِقَن قَفَا
وبـقـى جِـــــســــمــــــي دايـــــــــــمــا في انتحال

من طرف **دمعات الندم** الخميس يونيو 24, 2010 7:49 pm

جرح الريدة
جعفر السقيد
ســــافـر يــــا جــــرح جـــواي فـــــوق جناح السرعة
الموج يوم يضارب الشـاطئ والريح لما تطفئ الشمعة
والـمـحـبـوب وقـت يجرحني لو ضمير يحس أو يوعا
جـرح الـريــدة كـان يـتـعـد مـن ضمن العجائب السبعة

الـضــايــق عــقــارب الــريـــدة يـرميهو الأثر بالخلعة
بـنـوت حــواء مـا لاتــنــو بـالـخـوف والشجن واللوعة
بـالـلـيـل والـجـراح نـتــاحـة والـنــاس ناموا بعد الهجة
شـفـت بـنـات نـعـش فـي دمـي يـتـهـادن بـهـيات طلعة

يا قلبي الحزين اسمعني خت قرض الصبر في الوجعة
قـول لـي كـيـف تـفيدك عترة وانت وقعت كم من وقعة
اشــهـدت واسـتـغـفـــرت وغـســلـت الـعـلـيــــك بدمعة
اتـيـقــنـت قـلـت بـراك مـا لـيـك تـب عـشـم فـي رجعة

مـالـك قـلـبـي مـن تـطـراهـا بـالبيك لا بتحس لا بتوعى
مـنـحــوس انـت مـن مـا قـمـت اصـلك ما بتفوز بقرعة
سـعــدك لـو تـجـيـبــو كـرامـة كان مديت زمان القرعة
فـي الـمـر مـا عـلـيـك مـلامـة أشـرب ما تفضل جرعة

الــنـــاس قـــالــوا لـي انــســاهـا لو داير تطيب بسرعة
حـاولــت وغـلـبـنـي انـسـاهـا ذكـرت صبحت لي طبعة
طـلــعـتــا فـي صـبـاح ايـامي لا غابت خميس لا جمعة
ســرقــت بــالــي مــا فـضــل لـي مـنـو قدر اعد لسعبة

يـا ســت الـحـســان احـلامـنـا مـا بنلقاها عن ست ودع
فـي دنـيــا الــغـــرام والــريـــدة الـبـكا والنواح ما بدعة
زول كانت مشاعرو عليك جاري زي الحجر في الفلعة
محـتـار نــارو كـيـــف يـطـفـيـها مادام النفس بقى ولعة

من طرف **دمعات الندم** الخميس يونيو 24, 2010 7:50 pm

منـك لله
محمد سفلة
جعفر السقيد

ومــنـــك لله انـــــا زول مسكين
تـاتـيـتـو هـواك فــــوق الايدين
مـن قـبل صـبـاك من عهد اللين
خـــلاني وطــار ربـى الجنحين
والـخـان الـريد دا الـخـان الدين
..
في حـقـي الـراح انـا عندي يقين
واثـــــــق في الله لابـــــــد يبين
حـق الـمـظـلـوم مـا برجي متين
سبحـان الـقـال يـظهـر في الحين
..
يا (ق) يا (و) ويا (ر) ويا (ش)
يا حـبي الـمـات في مهـدو جنين
قــادر انـســــــاك وابـعــــد لكن
مـن بـعـــدك تـــاني اقــبـل وين
..
مبـداي عـارفـاهـو الزين بالزين
والـسـن بالـسـن والـعـيـن بالعين
مظـلـوم مـنـك تـلـقـيـني حزين
اقطع من جلدي واضاري الشين
..
سـرك في بــيـر جــواي دفـين
عـارفـاني علـيه حريص وامين
ما بـنـسـى العـشـرة البيـنا سنين
لا بـقـسـى عـلـيـك لا تـاني بلين
..
لـســع بـهــواك وقــلــبي سجين
مـن اســر هــواك تـفـكـي متين
شـالــني شـمال ضـيـعـني يمين
وانا مــت خـلاص بـاقي التأبين

من طرف **دمعات الندم** الخميس يونيو 24, 2010 7:51 pm

يا خي ما معقول
جعفر السقيد

انــا الـعـلــيـت هـواك بـراي لــمــن طـال وطـال معناي
وقــادر تــانـي بـرضـو بـراي اهـد اركانـو غادي وجاى
يا خي ما معقول تحبي سواي وتنسي وفاي وتغدري بي
تـهـدى بـنـاى تـقرري تانى ترجعى لى يا خي ما معقول
اكــــون لـلـــيـــــلـى مــســتـــنـــــيــك وراجـــــــى الرى
حـلـيـلـو زمن بسوقنى الشوق على لقياك رضى ورضى
هـسـى بـقــيـت يـجــيـــنـى نـــداك اطـانـش واقـول مالى
خــريــفـــك كـان شــلـع بـــراقــو بـرفــع لى كريـم ايدي
اقــــول حـــولــيــنــا ماها عليـنا تنزل في الهويد والصى
رفـضـتـا هـواك مـن طـرفك عشان ربطك مرخرخ ونى
طــويــت ذكــراك والاحـــلام ونـجـضـتـــا الجرح بالكى
ودقــيــت صــدرى لـلأيـــام مـــســارب لـلأمــل والضى
بــعــد مـا كــنــتـى كـل حــــيـــاتـى هـسع ما بتمثلى شئ
فــرصـه سـعـيــده كـانـــت بــيـك علـيك بتعرف احزانى
واعــرف ويــن مــقــاس صـبــرى قــوة عزمى وايمانى
وحـــات الله مـــا مــحـــزون عــلـى الــراويـهـو شريانى
زمــان اديـــتـــك الـمـعــدوم ووســدتــك قـلــــيــب حانى
ومـنـك مـالـقـيــت غـيـر طعنه سكنت فى صميم اعضاى
وضـريـت ريــدى لـيـك لـلــريـح وشــدت للامـاني قواى
وشـقـيــت بـيـن جروحى دروب ومن غدر الحبيب نجاى
وكــت اظـــلــم عــلـي الـكــون وودع في الـنـجـم ضواى
رغــم الـــبـي مــن احــزان وكــنــتـا عـلـي الـفرح هداى
والـجـرح الـبـيـنـتـح جـوه يـطـلـع مـن صــمـيــمـو غناى
مـا الـقـمـريـه رغــم الـنـبـله وصـوت الـطـلقه والحاحاى
مـــالـى غـــنــاهـا عــصـريـاتـنـا يـوم مـا خـلـت القوقاى

من طرف **دمعات الندم** الخميس يونيو 24, 2010 7:53 pm

لا تعتذري
جعفر السقيد
عذرك ذاتى ما برضاهو يا ظلامه اريت لو تدرى
اسفك زى رديفة الكية فوق جرحاً مدمى ومهري
لا تعتذري لا تعتذري لا تعتذري
أسفك لى ماهو استيكة تمحيبه العذاب من صدرى
لأنو الجرحه ماها كتابه لا ظلمك قليماً مبري
ما بفيد إن حرقتى ندامه أو غرقتى دمعاً يجرى
هل ممكن يعيد لى أساك روضات الأمانى البدرى
بعد كاويقا طاربوا الريح مشتتو زى دروب القمري
وكاسوا السيل على مجراه باس الحادى نحساً فقري
كانت فيك ثقتى عقيدة ما قايلك تخونى تغدري
وما بتمني اشوف محياك لو كان تبقي ليلة القدري
يكفينى المنجض فيها دون خلق الله زايد جمري
امناك قلوبنا امانه مو شان يوم تبيعى وتشرى
يا الفايتاك حقائق الدنيا راجعى فصوله عيدي واقري
ياما الناس مضايري همومه برغم العوج منستري
وانتى تكشفى ديمه ضرانا لشماتنا طوعاً وجبري
قلبي مصيبتوا من يوم جاك مقطوع من هناهو ومبري
هسع إن نيتو فيك حليلو قال لى ناس همومو انتري
إلا مريكبو لاجت طايحه فى قلب الغريق مندفري
ومامديتى إيدك ليه إنتى تعايني فيهو وتدري
سبتي مصيروا لى ايامو دون مجداف وكاسر المدري
وخاف معسر اساهو بعيد مريكبوا على الضياع منحدري
كت بعذر هفاك حقيقه لو كان فى الحصل منجبري
كم صبراً صبرتوا عليك هسع زى ذاتك اصبري
ما إتلمينا شان سببين شان بخلص واصونك قدري
شان كان فى دريبك عوجه دربي قصادوا واقف دغري

من طرف **دمعات الندم** الخميس يونيو 24, 2010 7:54 pm

غلطان أنا
خالد شقورى
عبدالرحيم البركل
عـاشـق عـيـونـك كـم سنه معليش خلاص غلطان أنا
مـشـيـت عـلى دربـك سـنـيـن افـرش دريـبـك بـالمنى
سـرحـت فـى واديـك زمـن نـاس الهموم ناس الضنى
كـتـبـت فـيـك احـلـى الـكـلام نـظـمـتـا فيك اجمل غنا
خـلـيـت يـمـيـن كـل الـبـلاد واخـتـرتـا دنـياك احضنا
مـعـلـيـش خـلاص غـلـطـان أنا وكل الحصل بتحملو

انـا لـى زمـن مـتـمـنى يوم آخر المطـاف بس اوصلو
ويـقـولـو لـى مـبـروك عـلـيـك ونـبـدأ الـفرح من أولو
نضحك كتير جنب الصحـاب فى يـوم سعيـد ما اجملو
معليش خـلاص غلطان أنـا غلطـان عشان بغلط كتير

غـلـطـان عشان قايـلـك هـنا إمكن معاى تبدى المسير
غـلـطـان عشان مـن الـنسـيم لو مس لى جسمك اغير
غـلـطـان عشان مـن دون جراح فى دنيتك داير اطير
ماكـان زمـان بـتـقـولى لى غيرك محال اعشق حبيب
مـهـمـا قـسـت كـل الـظـروف أنا ليك ما ممكن اسيب
آيـه الـجـديـد فـى حـبـنـا آيـه الـحـصـل آيـه الـغـريب
لـو مـا الـزمـان غير هواك ولقيتى لى جرحك طبيب
قولى زى ما النـاس تقـول انو الزواج قسمه ونصيب
معـلـيـش خلاص غلطان أنا ومن قلبى ليك كل المنى

تـتـهـنـى بـى فـرح الـعـمـر ويــذدان قـليـبــك بـالمـنى
ياهـو الـقـدر وانا راضى حتى لـو انكـتب لـى الضنى
تـتـهـنـى انـت مـع الـنصـيـب وانا ليك بنظـم فى الغنا
اصلوا الـحـصـل ما منـك انتى بس صحيح غلطان أنا

من طرف **دمعات الندم** الخميس يونيو 24, 2010 7:55 pm

بالميلاد
كلمات الاستاذ / خالد الباشا
غناء / محمد النصري

الايـام مالن مـاهـن فـى الآلآم داقـالى اوتاد
الايام كاتـفانى حزيـن وسـوجرن الاشواق باصفاد
كـندكن الأحلام بـالحـسـرة ويبسـن الوديان فى المسرى
ولو بتعـدل الخطوة والـعـتـرة مـا اتراوحت وجيتك صاد
مـا حـبـيـت عـيـنك بـالصدفة ومـا لاقـيـتك دون ميعاد
اتـلاقـينا صـباح الدنيا وشلتك منيه واتجنستك فى الميلاد
اتحـسـسـتك حـب بـاـفطره وعـشـتـك فكره وشلتك زاد
ومـن شـقـيـت طريـق اشواقنا ولامن جيت من عندك صاد
ويـوم مـا جيت من عنـدك راجع كلى مواجع ونوح وسهاد
اتوكـيـتك حزن دامــس بـين خـلجات الـقـلـب الراد
واتـلفـته عـشان الـقاك فـرحـة زول بـي زولـوا العاد
وانا ماشى مبارى دريب الرجعه محطه محطه لقـيته رماد
حتة كنا وحـتة كان الــشوق وقاد
الاطـفال احـسـاس الوحده الآمال مـنشره سواد
لا لاقــيـت اطـفـال بــيـغــنوا لا اتـنيـن قاعدين يتمنوا
وادى الخـير مرابوا جـراد يـا احـلام الـقـلب الراد
واتـذكرتا انـا لـيالى الهجعه وخيال الشوق مشدوده شداد
غـيـبـتك كـان اسـبـاب وسـفـر الـطـيـف فى العـتمه جهاد
يـاما مـشـيـت فـوق دربـك اسـعى طول الليل شقيتلى بلاد
كم كـبـيـت فـوق دربـك دمـعـه واسـتـنـيـت طيفك ما عاد
واه يا زول اهـديـتو حـيـاه اهـديـتو عـيون ومروه وزاد
اه يا زول اهــديـتـو بـيـوت اديـتـو خيـوط شعرى الوقاد
لـو فـاضـل فـيـك مــن ريدى رماد
اطرحـلى وشـيك انا دايـر اجـيك لـيه بـابـك ساد
لـيه الأحزان لــيـه الآهـات والدمـعـة حــصاد

من طرف **دمعات الندم** الخميس يونيو 24, 2010 7:57 pm

بحر السراب
محمد النصرى
يـا فـرحـه فى بـحـر السراب يا كلمة فى اول جواب
يـا واحه فى ليل الصعاب آخر شعاع وسط الضباب
يـا نـجـم مـن دنـيـانـا غـاب يا اغلى ما تحت التراب
تـنـخــلـفـى قـبـال العذاب بيك برسل الآهات خطاب
يـمـه يـا الأمـل الـرحــل قــبـال يـقـول كـلـمـة وداع
يـمـه يـا الـنـور الـخـفـت قـبـال يـرسـل خـيط شعاع
يـمـه يـا دمـعـة فـطـيـــم خـلــوه لـي لـيــــل الضياع
يـمـه يـا مـركـب نـجـاه غـرقــت قـبـل تـفـرد شراع
يـمـه يـا نـجـمـات صـبـاح مـرن سراع مرن سراع
يـا يـمـه مـن بـعـدك انـا اصـبـحـتـا لـلأهـــات وطن
دروشــتـا فـى خـلــوة أســاى ســبـحـتا بخرز المحن
كـتـحـتـا صـبـري انــا لـلــريـاح غنيتا للاحزان بكن
دقـيـتـه بــاب الـذكــريـات كـان الـقى لى هناك سكن
ما لـقـيتا صورتك فى الخيال لا شفتا من بعدك زمن
ودرتــا لـى درب الــرجـــوع كـل الـمــعـــالم اختفن
فـتـشـتـا فـى كـل الـبــلاد كـان الـقـى لـطـيـبـتك مثيل
دورتـا فـى كـل الـبـقـاع شـايـل عــذاب لـيــلاً طويل
زادى الوحيـد كـان الصبر فى الظلمه والزمن العليل
زمـنـا يـشـيـل حــق الـضـعـيـف يـديـهـو لعابر سبيل
زمـنـا يـغـيـر كـل شـئ حـتـى الـزمـان كان مستحيل
يـا يـمـه كيف يتبلا شوق والشوق على كل يوم يزيد
لا انـتـى بـنـتـى ولاهـو راح لا غـيـرو الزمن المديد
يـا يـمـه بــعـــدك لا فـرح طــلانا لا ضــمـــانـا عيد
غير خيط امل يبدا ويروح كل ما العذاب يرجع يعيد
كـل مـا اقـول يـا داك فـرح الـقـاهـو مـنـى بعيد بعيد
لـكـنـى راجـع لـيـك انـا بـالـرغـــم مــن كـل المحال
جـايـك عشان اعرف خطاى من وين تستف للرحال
جـايـك لـو كـان مـسـتـحـيـل جـايـك او كـان بالخيال
راجـيـنى لـو كان فى الحلم ما الدنيا من بعدك زوال
عـنـوانـى خـلـف الـلاوجــود يـا امـى يـا ابـعـد منال

من طرف **دمعات الندم** الخميس يونيو 24, 2010 7:58 pm

جـمـرالطـلاق
جعفر السقيد
الـدنـيـا كـان نـص الـنـهـار شـمـس الله فى كـبد السماء
والـتـسـمـه نـايـمـى فى الـخـدار خايفى الهجير لا يلثمه
لا قــونـى اطــفـــالاً صــغـار فى حــالـه يـائسه ومألمه
وقـــالــوا لـى بـى كـل انـكـســار الـدنـيـا يـا عم مظلمه
ســألــتـا مــالــكــم يــا ولاد جــرت الــدمــوع متلاطمه
وجــانـى الصغـير بى شويش وبى إلفه فى قلبى ارتمى
قـــالـى بـى خـــاطــر حـــزيـن الدنيا صبحت ما بتطاق
امـى وابـوى بـلا سـبـــب يــــا عـمـى اعـلـــنــو للفراق
واخــوانـى خــلــو الـمـدرسـه كـايسين دروب الإرتزاق
ويــامـا كـتــيــر نـاس زيــنــا بــعـانـو من جمر الطلاق
بــادرنـى بـى أحـرج سـؤال يـا عـمـى هوى غلطان منو
احـتـرتـا انـا وحـار بـى الـدلـيـل كـلـمنى بس اعمل شنو
وقــبـال اجـاوبـلو السؤال بادرنى ياعمى هوالغلطان منو
غـلـطـان ابـوى الـمـا قـدر يـفـهـم إحـــســــــاس الصغار
ولا غـلـطــانـه امـى الـمـن زمـن مالـيها هم غير الشجار
ولا الـغـلـط كـان مـشـتــرك يـاعــمـى سـوء فى الإختيار
ولا الــزمــن اصـبـح صـعـب اسـلـوبوا ما بيعرف حوار
يـاعـمـى هـوى غـلـطـان منو عيشتنا صبحت نار فى نار
خـــايـــف يــجــــونــا بـعــد زمـن ويـقـولـو امات للإجار
احــسـن لى امــوت انـا بـس طـفل قبال مـا يتخذوا القرار
مـا بـتــعـرف الـغـلـطـان مـنـو ماالاسره انقسمت خلاص
واحــديــن يــأنــبــو فى ابـوى ويـبـثـوا فى أمـى الحماس
حـــبــوبـه ام قــلــبــا رهــيـف وقـفـت عـلـى خط التماس
غــابــت خــلاص الـمـعـرفـه والـعــقـل امـتـلـكوا النعاس
لازال بــيـحـكـيــلـى الـطـفـل قـال لـى والـمـوقـف رهيب
الـشـئ الـمـحـيــرنى وعـجـيـب وخلانى فى موقف مهيب
خـلـق الله لـيـه يـتـخـاصـموا ماالمولى خلق الكون رحيب
والـشـئ الـبـحـيـر تـشـوف عـدوك تلقاه كان اقرب حبيب
اقــرب مــثـال امـى وابـوى الــريـــــده انـقـلـبـــت نحيب
كـان شـفـتـا لى صـورة الـعـرس والبسمه من جوه القليب
تـحـلـف بـأنـو الـكـون جـمـيـل انـشـوده من سحر المغيب
بـالله مــالــكــم يــا بــشــر حــيــرتــو لــلــطــب والطبيب
الليله شوف بسبب امى وابوى جانا الضياع صنقر قريب
واحـتـجـنـا كـل يـوم الـصـبــاح الـشـكـله من اجل الحليب
خـاصـمـنـا كـل الـمـجـتـمـع حـتى الـلـعـب بنشوفوا عيب
كـل خـوفـنـا مـن أخـطـر سـؤال مشكلتو ما يلقى المجيب
مـالـم اهـلـكـم يـا ولاد صـوتـن بـلا طـيـر شـافـلـو دبـيب
فى شان ده نلعب فى الشمس وننضارا فى الركن القريب
وقــبـال يــأذنـــو لـلـعــصـــر نــتــلـــمّ فى فــــد عنقريب
ونــوم ونـحـلـم بـى زمـن مــا فــيــهــو للأحــزان نصيب
كـان ردى لـيـهــو خــلاص كـفـى قطعتا قلبى انا بالعذاب
نـوع ديـلا قـايـلـيـن العرس زغرودة عن ساعة الخضاب
نـوع ديـلا قـايـلـيـن العرس طــاقــيــه يـلـبـســـه كل شاب
نـوع ديـلا قـايـلـيـن العرس زى نــزهـة فى مدن الضباب
لــو خــتـــوا بــالهـم لـلأرض كــيـفــن بـتـنـتـظر السحاب
يـا دوبــو كـانـوا بـيـعـرفــوا إنــو الـمـولـى ما سدالو باب
ولا حــتـى ابـلـيــس الـلـعـيـن وكـل ولادو عـلـى الخراب

من طرف **دمعات الندم** الخميس يونيو 24, 2010 7:59 pm

جــن الـريــد
علاء الدين عبدالرحيم
عبدالرحيم ارقى
أحـمـد مـعـــروف بـالــطــيــبـة حـسـن أخـلاق وعليها إتربه
تـكـفـي شـهــادة نــاس الـحــلـة إنـو خـلـوق وخـجـول ومُربّه
مـهــذب رغـــم حــــداثــة ســنـــو لبس تهذيبو أصالة وهيبة
أدي الــنــــاس الــحـــب أدوهـــو حـســن الــظـن بيناتن شبه
خـشــت فـجــأة أمـيــمـة حـيـاتـو وصـارت بـيـنو وبينا محبة
قــلـبــو إخـتــارهـا عشان معروفة زولة حنينة وراقية وطيبة
دســو الــريــد فـي الــســر بـيـناتُن وخلّو حبيس دفين ومخبه
وكـيــف تـنـضـارى مـتـل أشـواقن وليه زي ريدُن يوم يتخبه
بـعـد أيـــام وصـلـتــو رســـالـة جــواب مـلـيـان تقيل ومعبه
قـبـال مـا يـفـتـحـو عرف الراسل باينة وظاهرة رسائل وهبة
أخـوهـو الـلـيـهـو زمـن مـتـغـرب تسعة سنين قضاهن غربه
مـرسـل لـيـهــو تـذاكــر وفـيـزا دايـرو يجيهو هناك في طيبه
طــار فـي الأول أحـمـد فـــرحــه كـلــم كـل الناس والصحبه
لــمـا إتــذكــر أمـيــمـة حـبـيـبـتـو فجــأة إنتابو شعور بالخيبه
لـكـن قــرر إنـــو يــســـافــر ســـرعـة يــعـــود ويتم الخطبه
لأنــو الـغــربـه طــريــقـه قـصـير وفيها يهون تحقيق الرغبه
جـــاتــو امـيـمـة حـزيـنـة تـوادعـو جـاتـو تجفـف دمعو الكبه
جـــاتــو تـوصـي عـشان ما يقوى لا ينساها هناك في الغربه
جـــاتــو تـطـمـنـو إنـو حـيـفـضـل ريـده الـخـالــــد مهما غبه
حــافــظـه عــهــود الـريــدة البينُن ومهما كان ح يظلو أحبه
أهــدتــلـــو المصحـف شان يرعاهو من العين والهم والكربه
لـبـّـسـه عـهــد الـريــد فـي جـيده عقد ممهور بصورة الكعبه
قــامــو إتــوادعـــو زيــن إتــبــاكــو فات خلاها وحيدة وخبا
ســافــر شــال هــمــو وأحـزانــو بـعـــد أيام في المملكة طبا
لاقـو الـنــاس يـا زول كـيـف حالك بالأحضان قام سالم وهبه
قــالــو نـصـاح نــاس أمـي وأبــويــا مـشـتـاقين راجنلك أوبة
قــالــو أحـمـد ســافــر يـــا وهــبـــه غـيــر جوَّك وروِّق حبه
أمــك يــاخـي تـــلاهــي عــلــيـــك لاخــلالا ضــريــح لاقبه
الـســودان مــشــتــاقـلـك كـلـو ضـفاف ورمال سواقي وتربه
وحـتـى الـنـيـل فـرحـان راجيك تجي وتنهل من مويتو العذبه
بـعـد أيــام كــان وهـبــه هـنــاك بـيــن أصحابو وأهلو وأحبه
في حـــضــن أمــو الـطـول منـو في حيشانو الواسعة الرحبه
قـالـتــلـو أمـو أخــوانــك كـبـــرو ومـا فــضـلــنـا زول يتربه
بـس فـضـلـي أشـوفـو جـديـدك وكـتـيـــن لــسـع حـيـه وطيبه
إخـتــارولـو بـنـيـي سـمـيـحـي تـشـع حـيـويـه ورونـق وهيبه
أديـبـه وراقـيـه وكـلـها عفه وبرضو أهل وقراب في الحسبه
يـوم الـعـرس الـحـي صـبـاحي فرح مطبوق والناس منطربه
شــاق الـلـيـل صـوت كـم زغروده وحس طنبور ودليبن ربه
إلا فـي واحـده حــزيـنـه وبـاكـيـه سـايله دموعا دوام منسكبه
وفـي دمــوعـا ســؤال بـيـحـــيــر وفي آهـاته أسرار محتجبه
وقالو الناس دي دموع الـفـرحـه وغيرا شنو الحا يكون السِّبه
بـعـد أيــام ســاق وهــبـه عـروســو سـاقا رجع لي بلد الغربه
سايقو حنين لي كل أصحابـو ولي أحمد أخوهو أشواق ملتهبه
وصـل الـبــاب كــورك يــا أحـمـد فـتح أحمد بي لهفه ورغبه
شــاف قـــدامــو الــمـا مـتـوقـع هـم الكون فوق راسو إنصبه
شــاف الـسـلـسـل عـهـد الـريـده نفس السلسل وصورة الكعبه
شــاف قــدامـو أمـيـمـه حـبيبتو كانت قاسيه وقاضيه الضربه
شــاف أحـلامــو تـضـيــع قـدامـو بـعـد مـا كـانـت منو قريبه
كــانت لحـظـه تـفـيـض بـالـدهـشـه شـاف الـدنـيــا كأنها كذبه
كــورك أمـيـمـه أمـيـمـه وصـنـقـع صـنقـع ودنقر ودّر وغبى
وجــن أحـمـد فـي نـفـس الـلـحـظـه جـن الـريـد ما أظن ينطبا

من طرف **دمعات الندم** الخميس يونيو 24, 2010 11:06 pm

حبي أنا ليها كان أملى
عثمان عوض عثمان

حـبـى أنـا ليـها كان أملي وأمانى حياتى فى الدارين
إلا ظـنــونــا والـعــزال مـحـو الحـلم الرعيتو سنين
شلت هـواهـو فـى الأعـمـاق وفى قلبى العليها أمين
وفى أحلام ليالى الـغـربة وفى أنات غريب وحزين
وفى فجر الصبـاح الـبــاكـى فـى أهـات يتيم مسكين
وفى أنـفـاس عـميرى الباقى فى قيم الضمير والدين
واسـتـرجـع مـعــاها الذكرى واشكيلا الفراق والبين
وأحــدثــا عـن مـآسى الغربة واشواق الفؤاد والعين
واصنـاف الــعـــذاب الـشــايـفو والنار البقت نارين
ومـا كـان حـبى ليها خداع ولى غيرا الحنان واللين
وأبــدا مــا عـشــقــت خـلافا ومـا قلبى البشيل إتنين
ولا ســويــت مـشــاعرى شواطى للتايه من الوزين
ولا شـيــدت لـلــريــد قـبــلـه بـيــهــا ألـملم الضالين
وحات البـيــنـا كـان عـامــر وحات الجوه لسه دفين
ما حـبـيــت مـعــاهــا إنـســان ولا جـبـت نوم شقين
ومـديـت صبــري فـى الأيام بدل واحد بقن صبرين
ده كلو عـشـان أتـم مـشوارى وارجع للعديل والزين
وزى ماكــان تـعــد أيـامـا تسـأل عن رجوعى متين
وتحلـم بـالـعــديــل والـحــنـه والعش البفوح ياسمين
وتبسم لى خـيـــال أحــلامــا بـى قـلباً ملايـكى حنين
وتــرقــص بـالـفــرح تـتـنــي تـتـمــايل شمال ويمين
عليها أنا كان يطير قـلـبـى زى عصـفور بلا جنحين
ويـنــزل فـى ديــــارا يــغــنـى يـتــمـنى ويقول آمين
ويمسح من عيونا الدمـعــه مـن جـوفــا وقـلـيـبا أنين
وحتى الروح تسافـر ليـهــا والإحساس رفيق ومعين
شن فضل معاى فى الغربة غير جسدى وسهد العين
يـســاهـرو مـع الـحـبـيبه النايمه والعهد الوثاقو متين
ويحـلـمـوا بـالـطـبـول والـزفه والعقد اليباركوا الدين
ويـعـمــلـو لـى تلاقى ارواحنا والفرح البزيل حزنين
ولـمـا وصـلــت قـبـل سـلامى كان الناس بتسأل وين
واتلـمّ الـشــتــات فـى دارنــا مــن كـل الـقبايــل هين
وابتدت الخـلوق تـتـبـاري زى الـــعـــادة فى التخمين
أريتــم عرفـوا حالى البى واريتــم كانوا بس عارفين
إنو هواهـا روح لى روحى وإنــو قـلـوبــنا متعاهدين
وإنـى أنـا مـا بـسـيــب إنسانة شالت ريدي سته سنين
وما بنـســي البسيـمه الحلوه والسمح الكلامو رصين
والـذكـرى الـصـداها بـحـسـو فى أعماقى ليهو رنين
الا الـعــادة مـا بـتـتــخـلـى لـلــنــاس الـدوام فـارغين
لـفــوا الـحـلـى بـى أركـانـا جـاطـوهـا وملوها طنين
قـالــو تـحـت أخـتــرت حـلــوة مـن أجـمــل الحلوين
لـيـه صـدقـتـى يــا مـسـكـينه ناساً كان متين صادقين
واسـتـعـجـلـتى مـا أتـأكــدتى مـرقـتـى الكــلام الشين
وقلتى العود خلاص إنشـق والطـق سمعتـو الأضنين
وإنى أنـا مـا بسـاوى تـرابك السارت عـلي الكـرعين
وإنى مــن رمــوز الكـانــوا دايـماً للـعـهـــود خـاينين
وخـمـيـتـي الـرمــاد وبـكـيـتى وسيلتى الدموع نهرين
بدل مـا تـمـد أيـاديـك زهـرة شـربت من نزيف قلبين
وكـبـرت فـى رعــايــة الـريـدة طـالت طلعت فرعين
بـدل مـا تــقــولـى ســلامــه لــومــا قــلــتـى مشتاقين
أرهـفــتــى الـســمــع صـدقـتى للناس البجوك واشين
وصــاحـبــتي الـبـجـوك يـتـسـلو ما فكرتى ليه جايين
ورسـلـتــى الـعــزول بـرسـالـة حـادة واحد من سكين
وقـلــتى خـلاص نـهـيــتى البينا قلتى وقلتى لى آسفين
سـفـايـنـك ما بتلم فى ساحلى والشاطى الهجرتو سنين
وفـى لـحـظـة غـضب إخترتى فى لحظة عذاب وأنين
والـدرب الـصـبــرت عـشـانو فى آخرو اتفرق دربين
ما إنـتــى الـبــراك ابـحـرتى عـز الهيجة بين موجتين
وحاتك لى قلب مجـروح ومـحـروم من مُنى العاشقين
جـمـال الـدنــيــا يــا مـغــروره إلـفـه وريـدة بين إتنين
تـعـالى نـعـيــد سنـينـا الـضـايعه نرجع للعديل والزين
وأحسن ننسى كل الـفـات قـبـل ما يفوت عمرنا حزين
ومهما يقسى قلـبـك إنـتــى ويـفـضـل فى عنادو سجين
بكره مصيرو لى يــعــود ويــرجــع تـانــى لـىّ يـلـين
لأنو الريده جمرة نار يـعـيـش فى الجوف رمادا سنين

من طرف **دمعات الندم** الخميس يونيو 24, 2010 11:07 pm

حُبي الفقدتو بعد وَفاء
حُـــبي الـفـقـدتو بعد وَفا عَكَّر لي جَوِي بعد صِفا
وصِـبـحـــــــت ســعــــــــــــــــادتي مـــن المُحال
جَمري القديم ما كان كَفى موقِد يَلهـلِب وما انطفا
جَـــــــــات تــــــانـي هَـبــَتـــــو ريـــــــــــح منال
ريـــدنـا الزمان مالو اختفى مالا المودة بِقَت جَفا
ريــــدًا انـــت عــــارفــــــــــــــو حُـــلـــو وحَلال
الـبـِت دي وين كت شايفا أو مَرَّة واحده مَصَادِفا
يــا صــــــح تـــقـــــــــــــولـو سـمـعـنـــــــــا قال
رُوحي المـَشَـحتَفة عارِفا مالا السِّيرة بِقَت تَخَوِفا
شـــــــــــن دار يـــكــــــــون سـبــبـا غير الجمال
مـسـكــيـني فـاقِـدي عَـواطِـفـا عَشمِاني فيك تَوالفِا
راجــــــــــــاك تـَجُـــــــــــــــــــــودلها بالوِصَال
قلبي العليل كايس الشِّفا لو شِلـتو في حُضنَك دِفَا
كــان بـالــــســـعـــــــادة عِـــمـيــــــــــــري طال
قَدَمِي العليك سَاسَق حِفا هو بَراهو حَالتو يَوَصِفا
يـَغـــــــــــــنِي الـبـيــشـــوفــــــــــــو عن السؤال
غــالـبــــــني حــالتي أصنِّفا وِشِّي وقَفَايا بِقَن قَفَا
وبـقـى جِـــــســــمــــــي دايـــــــــــمــا في انتحال

من طرف **دمعات الندم** الخميس يونيو 24, 2010 11:08 pm

معذور
دا مناه يوم ما نتفرق يا ريتو كان يفضل معاك
لو بي مرادو يقوم يجيك تلقاه بين ايديك حداك
متمني ألحق بيك سريع نتلاقى والأشواق هناك
جاييك هارب من سنين جاييك واقع في حواك

غلبو النواح يوم فُرقتك بالدهشة خانس إتعبر
ما بين نوازع الروح إليك هايم وبين حُكم القدر
ما اتزعزع الإيمان جواه ولكنو في الآخر بشر
قايل عليك شدة وتزول ما قايلك إنت علي سفر

ما كان هو فاهم يومو داك إيه ضحكة البرق اللصف
ولا كان هو شايف للهموم الجاية واقفات ليهو صف
ولا كان هو حاسس بالغرام الباني في الغيم إتنسف
لقى نفسو فجأة بلا وجيع مفجوع ومفقوع بالأسف

يا ريتو كان وقف الزمان قبال تروح صدَّ ورجع
ما كان غشانا الحزن يوم لا فُرقة بيناتنا بتقع
كان لا رثيتك لا بكيت لا قلبي فيك يوم إتفجع
وما كان قدر ذكراك صِبح يومها التزور مُره ووجع

من طرف **دمعات الندم** الخميس يونيو 24, 2010 11:09 pm

بلادي أنـــــــــــا

بلدي بلد ناسا مواريثم

في أول شي ..كتاب الله

وحصان مسروج، وسيف مسنون حداه درع

كتاتيبم تسرج الليل مع الحيران

وشيخا في الخلاوي ورع

وكم نخلات تهبهب في جروفا الساق

وبقرة حلوبة تتضرّع وليها ضرع

بلدي أنا

تشيل الناس ، كل الناس وساع بي حيلا وليلا يسع

وتتدفق مياه النيل على الوديان

بياض الفضة في وهج الهجير بيشع

بلدي سهول ، بلدي حقول بلدي الجنة للعاشوها

ولي البرّة بيها سمع

بلدي بلد ناساً تكرم الضيف

وحتى الطير يجيها جعان ومن أطراف تكيها شبع

بلدي بلد الصفقة والطنبور وجاراتن تنق بالليل

وبنوتن تحاكي الخيل

يشابن زي جدي الريل

بلدي أمان ، بلدي حنان وناسا حُنان

يكفكفوا دمعة المفجوع

ويبدّوا الغير على زاتم

يقسموا اللقمة بيناتم

ويدّوا الزاد حتن كان مصيرم جوع

يحبّوا الجار

يموتوا عشان حقوق الجار

يضوقوا النار عشان فد دمعة

وكيف الحال لو شافوها سايلة دموع!

ديل أهلي .. واللــــــــــه ديل أهلي

البقيف في الدار في نص الدار

وأقول لي الدنيا. كل الدنيا ديل أهلي

عرب ممزوجة بي دم الزنوج الحارّة

ديل أهلي .. ديل قبيلتي لمّن أدور أفصل للبدور فصلي

ديل فصلي

أقول بعضي

ألاقيهم تسرّبوا في مسارب الروح

بقوا كولي

ألاقي قلبي والإحساس

وسافر في بحار شوقم زمــــان عقلي

أنا محل قبّلت ألقاهم معاي ، معاي زي ضليّ

أنا لو ما جيت من زي ديل كان وا أسافاي ، وا مأساتي وا زّلي

تصوّر كيف يكون الحال لو ما كنت سوداني...

وأهل الحارّة ما أهلي تصوّر

من طرف **دمعات الندم** الخميس يونيو 24, 2010 11:12 pm

اشارات الوداع
هو كـان شايف اشـارات الــوداع فـي الـعـيـن
قدر جاي وامل راحل حزن قدر الفراق والبين
نـذر قدرو المداقر عمـرو لازم عمـرو يـتـودر
نـتر جـرحو بيبشر دمـو بـاكـر دمـو بـتـقـطر
عـرف فـرحـو السقـاه حـنـانـو والراجيهو بتاخر
شـعـر حـلـم السـنـيـن الـعـاشـو قـدام عينو بتبخر
حس هو لما ضم ايديهو بشوق العمر بجري
وحس كمان ضياع آمالو فاجئو في القلب بدرى
كانو عيونو كان بتقول وداع يا حبنا العذري
غمد اكان يضاري دموع وتخزلو دمعة منحدري
بسم رغم الفراق الجاي ياها عيونو زي اول
ضحك امل الزمان ضاميهو رغم انو الالم طول
سخر من الحياة الودارة عمرها مابتناول
ثبت حتحت دموعو الحري عن عينيهو ما تحول
رجع لايام زمان لا قاهو في درب العمر صدفة
ايديهو الرادة ياها ايديه تضمو وبينا يدفا
عيونو الحزن ما هداها بل زاده الوجع يدفا
قليبو في يوم فراقو الابدي فارق حتى بالالفة
فضل جنب الحبيب ساهم فضل ساهر قريب منو
شرب على قدر ما اداه الله من القليب حنو
فضل في كل ثانية يريدو ابدا ما انشغل عنو
دفع كل العمير والعافي كان يفداه لكنوا
حبس كل الكلام في جوفو خلي عينو تتكلم
كتم بوح الانين واللوعة نار في حشاه بتالم
صبر لما النهاية المرة حانت وبالمصير سلم
مسك قلم اليقين من حبو رغم اساهو يتعلم

من طرف **دمعات الندم** الخميس يونيو 24, 2010 11:13 pm

الضرب فوق الميت

اعتدت الجراح ياغالية ما عاد البشوفو جديد
ومابشعر بقيت بالطعنه مهما كان مداها بعيد
واحد عندى كان الامى تنقص ولا تانى تزيد
والا أصبح ملاقى مأسى والا يطل على العيد
ماهو غريب عليها الدنيا تقصد قلبى بالتحديد
ودون الناس براى ياحلوة ابقه عدوها انا الويحيد
يانى صريعه من شبيت فوق مهد الطفولة وليد
ولم كبرته واترعرعت فى دنيا الغرام والريد
من نار العذاب الضقتو لو ماكنت زول صنديد
كان فى قبرى بدرى رقدت فى جوف ود أحدو شهيد
إلا هواك ملانى عزيمه آه يابلبلى الغريد
بلقاك والمحن حابكانى دايماً ليه مادى الليد
الا الليله عاد فى الغربه نازف قلبى دمو صديد
والموت قبل أجيك صدقنى ياهو مصيرى تانى أكيد
الشقى فيها أمسى غرينى والقيد فى خطاى حديد
والشوق بى لهيبو ونارو يلعب فى حشاى عربيد
فى ركن السجون اتباكه أرزح فى الظلام والقيد
وخايف تبقى فيها اقدارى حاكمه على بالتأبيد
لويجدى الشعر ادمنتو كم سطرت فيهو قصيد
وترجمت العليا أغانى لو قول الشعر بيفيد
لو عش فى الجنان يابوحه غيرك ماحأبقى سعيد
ودونك لو هدولى ثماره برضىء أشوفه مره شديد

من طرف **دمعات الندم** الخميس يونيو 24, 2010 11:14 pm

الفرح الحزين

يا قلبي الحزين وين تمشي ليه كل الدروب مقفولة
كيفن زول يصل للجامعة يرجع تاني لي سنة أولى
ياما كتار حليلهم ضاعوا في زحمة دروب مجهولا
يزرعو في النوايا الطيبة كان ثمرة ضياع محصولا
الواحد يريد النجمة ما بيقبل يشوفو افولا
تلقى وسط ظروفو يشابي عشمان انو بكرة يطولا
مسكين كان يخادع نفسو بي سحب الخريف وهطولا
متعشم يقول المسرة يوم باكر يدقو طبولا
مسكين ياحليلو اتناسى نكبات الزمان وفصولا
واتناسى انو نحن غلابا احلامنا العراض مطبولا
من زمن القراية شراي ما بشوف غير سيوف مسلولا
كل ما اقول وصل لي مرسى القى احزاني شادى خيولا
قاسي الزي يقلى الداريو نقاي يعرف المصقولا
اول ما يقول ديك لي كل خلق الله بكرة يجولا
عايش فد سؤال جواي ليه لحظات فرحنا عجولا
وايام الحزن تندب زي السلحافية مهولا
اختلطت على ايامي قدامي الهموم مسدولا
ممشكلتي العلي ومالبي ما هو مرض دوا وكبسولا
اه اه اه اه اه اه اه
اه من دنيتي واقدارا اه من جحيما وهولا
شينا الزي بلقى الدايرو منو الدمعة ما مقبولا
لكن يا رفاق بالدغري كلمات بي صراحة بقولا
انا كان جنيت او ودرت تبقى ظروفي هي المسئولة

من طرف **دمعات الندم** الخميس يونيو 24, 2010 11:19 pm

أمانة عليك
الشاعر : خالد الباشا

أمانة عليك تخت بالك على الجواك علي الحلم البنينا بيــــــــــوت
علي السر الدفنّا كــــــــــــــــــــــــــلام تحت وجع الليـــــــالي سكوت
أمانة عليك .. قبل ترحل مع الأيام تشيل حلو الأماني تفــــــــــــــوت
تدس في بير حواسك ريــــــــد سقينا وفـــــــــا و حــمينا يمـــــــوت
و امانة عليك يظل اسمك حروف من نور علي حيط الفؤاد مشخــوت
عهودي معاك أموت واقف علي باب الهـــــــــــــــــــوى المفتوح
انا البرحل محـــــــــــل ترحــــــــــل غمامة عليكا و ين ما تروح
لأنك إنت في الوجـــــــــــــــــــــدان مشكن بين حـــــــنايا الروح
موسمة بيــــك تفاصيلـــــناو مضمدا بي غـــــــــــــــناك جروح
تعيش في ذاتي و الذكــــــــرى متـل صـــــــفق الشتــي المحتوت
أمانة عليك
سنين الإلفـــة بيـــــــناتنا قمـــــــــــر لــــــــــيلاتك الصـــافي
تفاصيل روعتك جـــــــــــــواك منابع إحســــاسك الدافـــي
حواس خليتا يالمحبـــــــــــــوب وراك لا فيــــــــــــــنا لامافي
تموت بي شوقـــــــــــك الأفراح أمد باللهفة اطـــــــــرافي
مكان ما عشت في الأعماق هناك كلك عشق مخـــــــــتوت
اماني وراك مابتنســــــاب علي طرف العيون دمــــــــعات
امش و انا بالأماني ارجاك سنين عمر الجفا الجايــــــــات
و امانة عليك محل تـــــــنزل تمــــد حبل المحبة صــلات
يشع نور الوفا الماليــــــــــك تبق ليل الفراق غــــــنوات

مكتبة اغاني الشوايقة

مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة

رد: مكتبة اغاني الشوايقة