قصــــيدة بت مــــــن ورق

من طرف **nory** الثلاثاء أبريل 07, 2009 7:46 pm

هوي يالحبيب أحسن عيونك فتّحن
ونفض غبار الجامعات الكتّحن
عبرات هواي لو سدسدن حلقك دحين لي زول سواي ما تنحنحن
وأنا أصلي عارفك مابتحن
ليه العوينات البريدنك تخونن وتجرحن
لي بالدموع والنوح مع الناس تفضحن
وأنا ديمه بسأل ربي أنو الطالبات يسمّحن
ويفرحّن ...وبالخير تملي يصبّحن
ولو في مشيهن لكلكة يصّلحن
بس لو ظهر كاشف رقم لايصافحن لاينجحن
هو شنو الفضل في الدنيا شان الناس تذاكر وتمتحن
بس نبرا من عيشة الفقر...
وسمح السكات الفي خشم سيدو وكمان سمح الصبر
مادام في مدرسة مدرسة وأساتذة خصيصين نجاح
وحصص صباح ودرس عصر ...
حأنسوي أيه ؟ حاندق جرس آخر فصل أو ننفصل
نتلم نشوف باقي العمر
ما واضحة ذي عين الشمس ..واضحة كان هسي و أمس
وأصلي مارق ياضنى من غربتي الأنا مدمنه
من بلوتي وسلواي انا
من قصة لا بتأكلنا عيش لاتفر جبين هذا العنا
من شدة فاردة الأرتخاء ومتمكنة
من ممكنة وما ممكنة
وأيه لزوم يعني القصيد وكتين تموت العاطفة
وكتين نعّتم فكرتو وحروفو ذاتا نلّونا
وكتين نغتغت مهجتو وندس عيونو وندفنا
أيه لزوم يعني الشعر الما عرف معناه ولا شيتا عناه
أبقى مارق ياجنا كان كن هناك أو من هنا
كان منهم أو مننا....
من مزامير التوجس والغنا ..من صباحات الهواجس من طوابير المدارس
ومن مروق الروح ..وأمرق من متاهات النفس
ماواضحة ذي عين الشمس
واضحة في كل الجرايد والقصايد والمعابد والمصانع والشوارع
لما دون نشعر نحس ولما دون خاطر يمر
واضحة أنو سكاتو مقدود من دبر
وكلامو مقدود من دبر
وضميرو مقدود من دبر
وقميصو مقدود من دبر
لكن منو البيشهد عليك يابت مادام كلك عذر
يا بت ما دام عرفوكي جد بتخافي من ضل الضحى
ومن بشرة الناس السمر...
ويؤسفنا جدا أننا
يوسفنا أسود مننا ومحنية ضهرو من الكبر
وعرفوكي جد بتخافي من ضل الضحى
ومن ضحكة الناس السمر
عرفوكي بس هم ما أظن فهمو العيون السمحة فيك كانت شتر!!
ويسلم ضراع الطين وقدح المونة وجيت أمونة در الواطه
واده صحونة للولد البيشيل طوريتو سبّاق الفجر
وتضيع سنين العمر ليه في المدرسة؟
المدرسة الما بتجبر الخاطر إذاً
المدرسة مابتستر الحال بكرة
مابتملالنا فد شوال تمر
ياخ إيه لزوم يعني الدفاتر والمحابر
والشنط والأردية والدك ودرس اليوم
وحلق الراس وقليم الضفر
إييييه يا سنين المدرسة
فدتينا إييه يامدرسة؟
دي الجامعة لسع فيها ناس
بتحب بعض وتلبس بعض
وتاكل بعض وتقوم بعض
وتقعد بعض منو العوض
وليهو العوض
وفي ناس كمان تجمع ورق فاضي وتمر
تنجح فشل تسرق حصاد غيرها وتمر
وكتييير في ناس بتفط سطر
ياشعب أصحى كفاك شقى
وكفاك خطاك على الجمر
لمتين حنحلم بالغنا
لمتين نعدي من الضياع
والفرقة والحرقة ونمر
وسمح السكات الفي خشم سيدو
وكمان سمح الصبر
والدنيا مازالت بخير
والدنيا مازالت فقر
وأن زي دراويش العشق
ماسقتا خطوات الرحيل
لكن مشيتا وبالجبر
لكن مشيتا وفوق جمر
وحبيبتي قالت لي: تعال
ومرقت من جلدي القديم
ودرعت توب الصبينة
ومشيت لها وأنا منتهي
سنتين ولا قعدت عيوني معا عيونا إتونست
لا في الخيال لاقيتا لا لاقتني هي
سنتين ولا بنبدالنا سكة ولا خطانا بتنتهي
سنتين ورغم الإبتعاد
والعشنا من خوف وإرتعاد
لسع سعاد هي بتستحي وأنا بشتهي
وأنا بستحي وهي بتشتهي
وما بين نعم واللقيا كان حرفين نهي
وأنا خاطري من كتر الهموم
الساعة خمسة نسا وسهي
وفي الهم غرق وبالشوق حرق
وحبيبتي قالت لي: تعال
خافت وكت قت ليها شيخ
مسكينة ماعارفا الفرق
بين الدراويش والشيوخ
بين الصفيقات والعرق
بين الغرق والما غرق
تاريها زيي أنا يا خلق
طينة ومطينة بالعشق
ومقتولة لى حد السكات
ومتيمة بس كنت ديما بعلما
إنو الحزن زاد الفرح
والفرحة نفسها مؤلمة
والعافية أسمح منها
لو حتى كانت بلسما
والشمس في توب من حلال
والقمرة أكبر مجرمة
وكضابة ما بتحلب لبن
ومليانة زيف ومهضلمة
وممسوخة مهما إتبرجت
مازي مصابيح السما
والقدرة ما بتنفات شبر
والسترة ميها الكمكمة
والناس سواسية كالمشط
والحرة دينا ملجمة
والحلوة مي حلوة طعم
والمرة ربنا قاسمة
والقسمة ما باليد كمان
الليد هي ذاتا مقسمة
أصبع صغير وأصبع كبير
وأصبع وسط وأصبع نضم
وأصبع بدخل خاتمة
وتفرق بداية الشوق كتير
وقتين تصل للخاتمة
مالريدة بتشوف بي تحت
والحب موشح بالعما
وما بفهم النور إلا زول
عاش في دياجر مظلمة
النجمة ما بتعني الوضوح
العتمة ميها الهضلمة
الوشمة ما نزفة جروح
والبسمة عزا البفهما
مالنسمة في الصيف لو تفوح
تحرق حشا البتنسما
والوجعة باااردة على الببوح
وتسل رويحة البكتما
والروح بتمرق ما بتموت
والجتة بتقيم مأتمة
ونحنا إنعكاسات للنجوم
والواطة ضل رامية السما
وأنا مارميت إذا رميت
وأي عاشق ما رمى
وضحك المشيب برأسه
فبكى ونادى سُلما
وسمت بغاة الطير
حين كبا حزيناً..
حزيناً مرغما
ووريتا معنى القارعة
وعقرو وربك دمدما
حفظتها الناس والفلق
والحمد والإخلاص
وطه ولم يكن والعاديات
وكأنما ما كان في شي!!
وبعد ده كلو بتنتشي
ولا بتستحي ولا بتختشي
وقرمتا كرعيها بالمشي
وكلمتها قت ليها: أوعى تدقشي
الطيبة ما في كل شي وما تهبشي
الجوة خليهو جوة فيك
والما يخش ما تخششي
ودمع الظنون البيني بينك قشقشي
والشوق على باب البريدك وشوشي
ونار النضال جنب الشمس
ما تمشي بي راحتك عليها
يا روحي هوي بتشمشي
وكان جاك خريف الوجعة
سويلك بيوت في داخلى
أبني وعشعشي
وأديني إحساس إني شي
وقرمتا كرعيها بالمشي
وكلمتها: خلي بالك يا بنية
العمارات البناطحن
والمعاني القرمزية
أوعى تسرق من ملامحك
أو تغيير فيك شوية
ماني شايل هم قرايتك
أنتي قراية وذكية
أبقي جد يا حلوة فاهمة
وأبقي واعية وكوني حية
أصلو في الجامعة العريضة
وفي بيوت الداخلية
في الحبايب وفي القرايب
وفي البقاسموكي الأسية
إلا برضو خلى بالك
هي المصايب مي شوية
العقارب والكهارب
والدبايب والمصايب
وألف سوسة وألف حية
وإنتي سمحة إنتي قمحة ولسة نية
ولو دقستي أسأليني أنا الدقستا
وأكلوني السمسمية
في زمنا وحات عيونك
بدفنوك يا زولة حية
أبقي واظبي على صلاتك
قومي كل ما نادى حي
وخلى بالك في الشوارع
والمسافات القصية
وفي مشاوير العصاري
وإنتي ساعة المغربية
وفي الحدائق والكباري
والملاهي الأجنبية
والوليدات الأخير لك
من تصاحبيهم بنية
والبنيات البظلتن وشهن
والبتعمل فيها شيخة
أو تقول بتشوف لها طية
وفي القراية سجم رمادن
أبقي مارقة وناغمي ليا
مرة تلقى الضمة شدة
ومرة تلقى الشدة مدة
وعادي تلقى الخمسة مية
وأسمع أسمع وياما تسمع
في البغنن الله ليا وكر عليا
وجيبو ليا عاد دا كلام
ونحنا يا حليلنا الغلابة
بلعبنبنا كوعلية
ودايرة بيرقر ودايرة شية
ودايرة طرحة وتيكو ملحة
ودايرة جسطي وميج ومسحة
وخصلة تايهة وشنطة بطة
وعمو أسرع إنقبضتا
وزولي نطا
ودي المحطة وهنا لقطة
وهنا لقطة وهنا لقطة
وهيي يا إنتا هييي وتاني هيي
عندكم كلب ولا أجي بالدرب؟
أطفر ولا بتدفر!! المافي شنو؟
أبوك لا راضي لا راضي
كيسك فاضي ولا نمشي القاضي..!
جر شخيت وأقيف بعيد..
وفي النهاية القصة فكة
دي الحضارة الدينا فكة
ولاحقة حبوبة أمي مكة
وعاملة فيها رشيقة حية
ومهما نصرخ هي هيا
وفي البتنسا أبوها إكدح
في ضنا أيامو الشقية
عشان هي تقرأ وبكرة تنجح
وتحيا مستورة ورضية
وفي الحليل أماتن إبكن
بي وراهن وووب وحية
إلا هن سجم المحنة
حليل زمنكن يارضية
لا فؤادن مرة حنا
لا طرن بالمرة جية
الشفايف مي شفايف
والشعر سون لو كية
وبدن الإسكيرتي شرطة
وتاني فوق الركبة طية
وبمرقن !!!
أحسن أسكت
أحسن أسكت!!
وشدي حيلك يا بنية
شدي حيلك يا بنية.

من طرف **Admin** الأربعاء أبريل 08, 2009 4:19 am

وهنا لقطة وهنا لقطة
وهيي يا إنتا هييي وتاني هيي
عندكم كلب ولا أجي بالدرب؟

تسلم يا باش مهندس

من طرف **nory** الأربعاء أبريل 08, 2009 5:10 am

تعال بى الدرب
مشكور يا حبيبنا على المرور
وبالمناسبه دى خارج النص

من طرف **ود الهندى** الخميس أبريل 16, 2009 11:45 pm

انتا عاااااارف ا ولدنا !!
انا !
أحسن أسكت
أحسن أسكت!!

من طرف **nory** السبت أبريل 18, 2009 2:18 am

هههههههه

احسن اسكت

ومشكور على المرور

من طرف **عبدوش** السبت مايو 02, 2009 3:17 pm

وحبيبتي قالت لي: تعال
خافت وكت قت ليها شيخ
مسكينة ماعارفا الفرق
بين الدراويش والشيوخ
بين الصفيقات والعرق
بين الغرق والما غرق
تاريها زيي أنا يا خلق
طينة ومطينة بالعشق
ومقتولة لى حد السكات
ومتيمة
-----------------------
ابداع يانورى والله تسلم
تقبل مرورى يا ولدنا