منتديات اولاد الحلفاية

قصيدة جازفوا اللابتوب بتاعي.

استعرض الموضوع السابق استعرض الموضوع التالي اذهب الى الأسفل

قصيدة جازفوا اللابتوب بتاعي.

مُساهمة من طرف DIOUF في الإثنين يناير 04, 2010 3:14 pm

lol!
مدخل:


يعني إيه لابتوب فقدتو
حاول انسى وشوف جديدك
وامشي في العزم العقدتو
إبتلاك الله البريدك
***
كان موثق لي كلامك
كان معينك وكان دليلك
كان جراب يحمل حسامك
خلي الله يكون وكيلك



النـّص:


ضربة كانت جد قوية
سببت ليَّ الأذيَّة
ضربة خشَّت في عِظامي
خلـَّت الموضوع هُلامي
***
جاني لِص وحرامي رِمَّة
جازف اللابتوب بتاعي
زول لئيم ماعندو ذِمَّة
لي دمار الأُمَّة ساعي
***
يا كريم زلزل كيانو
ما يغادر من مكانو
ياعزيز في الدنيا ذلـّو
ما يفارق لي محلو
***



بسأل الله يحِت عظامو
يرخي بصرو ويفشي سِرُّو
وكل يوم يظهر حرامو
وكل مره الناس تزُرُّو
***
يبقى زول جربان مُنَفـِّر
يبقى حايم بس براهو
جلدو بالعاهات يـِصَفـِّر
أصلو ما يلحق شِفاهُو
***
ليهو اسبوعين معايَ
فيهو حاجاتي المُهمّة
اللئيم زاد ليْ أزايَ
حقق أفكارو المُسِمَّة
***
فيهو حاجات للمدارس
فيهو لي أطفالنا فرحة
فيهو مسرح للعرايس
فقـْدو سبَّبْ ليَّ جرحة
***
فيهو للأطفال مآرب
فيهو إنتاجي المُصوَّر
فيهو جد هاردسك كارِب
دا العلم بالجد تطوَّر
***
فيهو إحساس بالمعاني
فيهو إرشادات سلامه
المديح ثم الأغاني
فيهو أنواع الدراما
***
ربي ورِّي اللص وَساعو
ربي أعلن عن اُفـُولو
وبالعدم أقطع ضراعو
وابدا إستئصال رُجولو
***
ربي يبّس كل حنانو
واقطع الصوت من أضانو
ربي أعلن لي هوانو
كل يوم يبلع لسانو
***
ربي سلط ليهو مَرْضة
في دقيقة تقرضو قرضة
ربي عطل كل حواسو
يبقى ما زول من أساسو
***
ربي أرمي اللوم عليهو
أصلو ما يتهنـّى بيهو
ربي هد في راسو أوضه
يبقى أصغر من بعوضه
***
ربي ما يغمِّض عيونو
ربي كسِّر كل سنونو
ربي أرمي عليهو صاقعه
كلّ ما يقوم تبقى واقعه
***
ربي سلـّط عين تصيبو
وبي سِراع تقطع نصيبو
ربي فش خلق الله فيهو
شمّت الأطفال عليهو
***
ربي فصّلو حته حته
وفي السرير خليهو جـِتـّه
ربي يوت خليهو صاحي
عرضه لي دقشة سياحي
***
ربي عرّضو لي أزية
لايضوق عيد لا ضحية
ربي أحرقو يبقى شيّه
وللحِدَيْ يصبح تكيّه
***
ربي عرّضو لي العقارب
كل يوم خلـّيهو هارب
يبقى مجنون سلكو ضارب
كل يوم يشبع كهارب
***
ربي سلـّط ليهو ضبعه
كل ما يقوم يلقى لبعه
ربي خت في رجلو طلقه
كل يوم ياخدلو علقه
***
تبقى كل نكباتو خالده
يندرع في كلبه والده
تنتفض تديهو قرمه
يبقى سعران ليهو خرمه
***
ربي عتـّر فيهو أصَلـَة
وفي العيون أعصِرْلو بصَلة
ربي جيب تمساح يقـُرضو
وفي الأساس ما نلقى فرضو
***
ربي سلـّط ليهو حُوته
وأصلو ما تكتِبْلو مُوته
ربي حنـِّطو في حياتو
وفي المتاحف يلقى ذاتو
***
ربي كيل نخرينو شطـّه
وبالجنازير زيدو ربطه
ربي أوجع ليهو بطنو
جيبلو موية نار أعَطـْنـُو
***
ربي تصبح روحو شارده
يـِنشَرق بي مويه بارده
ربي ما ينبَلَّ ريقو
أعدم الخير من طريقو
***
ربي ياسيد الأسامي
كاشف الهم والبلاوي
بلـّغ اللص الحرامي
يختى درب المستكاوي
***
ربي لو جا وصفـّى نيتو
من جميع الفات عفِيتو
وليهو بتمنى الهداية
والتسامح لي النهاية
***
ربي ياكاشف المعاني
أصلح الحال العلينا
ما نضوق السّرقه تاني
وما تبين آثارا فينا
avatar
DIOUF
عضو جديد
عضو جديد

عدد المساهمات : 8
نقاط : 20
السٌّمعَة : 0
التسجيل : 28/12/2009

الرجوع الى أعلى الصفحة اذهب الى الأسفل

رد: قصيدة جازفوا اللابتوب بتاعي.

مُساهمة من طرف محمد كمال في الثلاثاء يناير 05, 2010 12:04 pm

قصيده قويه
ورائعه
كروعه حبيبنا مستكاوي
الله يديو العافيه

ودمت لاثراء المنتدي
avatar
محمد كمال
مشرف منتدى الحلفاية الحووش الكبير
مشرف منتدى الحلفاية الحووش الكبير

عدد المساهمات : 377
نقاط : 483
السٌّمعَة : 4
التسجيل : 30/03/2009

الرجوع الى أعلى الصفحة اذهب الى الأسفل

رد: قصيدة جازفوا اللابتوب بتاعي.

مُساهمة من طرف superhuman في الثلاثاء يناير 05, 2010 9:24 pm

مشكووووووووووووووووووووور علي القصيده الرائعه

تخريمه

غايتو الحرامي الشالو ده لوسمع القصيده دي وما تاب ما اظن يتوب تاني
avatar
superhuman
عضو فضي
عضو فضي

عدد المساهمات : 110
نقاط : 132
السٌّمعَة : 1
التسجيل : 10/10/2009
العمر : 27

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى