منتديات اولاد الحلفاية

مكتبة المبدع مستكاوي

استعرض الموضوع السابق استعرض الموضوع التالي اذهب الى الأسفل

مكتبة المبدع مستكاوي

مُساهمة من طرف دمعات الندم في الجمعة يونيو 25, 2010 5:16 am

احد ابناء حلفاية الملوك محمد عبد الرحمن الشيخ هذا المبدع المستكاوي الذي ابدع في الشعر الحلمنتيشي ويسرني هنا ان افتتح لكم هذة المكتبة لهذا المبدع لننهل من هذة الابداعات الجميلة التي تعكس هذا الواقع المعاش المرير


ا لكفتيرة

يروي المبدع مستكاوي ويقول جاءت لتشرب الشاي


فجلست قرب الكانون

فانكشحت فيها الكفتيرة

الكانــــون ورّانــــا الدهشــــــة
ونســى نيرانـو اتأمّــــل فيهــــا
حتـى المويـــــة ازداد غليانــــا
مــن الفرحــــة اللـّمّـــت بيهــــا
والكفتيــرة بقــــت مضطربــــة
دايـــرة تخلـّــي النّـــار الفيهــــا
ومــن النـّــار انتفضت وطارت
علشــان تمثـل بيـــن رجليهــــا
يا كفتيـــــــرة يميـــن بالغتــــي
تصلـــي النجمة كمان تأزيهــــا
الشــرّاب والجزمــــة انخلعــوا
بقــوا يتوسّـلــو بـــــي إيديهــــا
طلبــو تدخّــل عاجـــل جــــــداً
لازم يطلعــــوا مـــن رجليهــــا
عشــان يتأكـّـــــدوا من خدماتم
ومافــي مصيبـة المّـــت بيهــــا
إلا السمحـــة الزيّهـــــا مافــــي
ربّهـــا عارف كيــف يحميهــــا
مـن النـــار وحــرارة المويــــة
ومــن العيــن الوقعـــت فيهــــا
ويــدّي النــاس الزيّنـــا فرصـة
يمكـــن نقـــــدر نكتـــب فيهــــا
يبــرد جوفنــــا ويبعـد خوفنــــا
يمكـــن يــــوم نتعـــرّف بيهــــا
وتبقــى البينـّــا صداقــة وإلفـــة
وقصّــة جميلة وأنـــا برويهــــا
ومهمـــا قلنــــا كـلام وكتابـــــة
مــــا بنستوفــــي جمـالاً فيهــــا
شفنــا حـلاوة وشايـلـــة حـلاوة
للحاضريـــــن بتـــوزّع فيهــــا
فيهــــا عيــون بالجــد جذّابــــة
مافــي اتنيـــن بتناقشـوا فيهــــا
فيهــــا قــوام منظــوم متناســق
ربـّك قــــادر وهـــو مجلـّيهــــا
فيهــا تبيــن بصمـات الخالــــق
زي الزهـــرة وكــت تسقيهــــا
تقـــوم تتفتـّــح وتانـــي تفرهــد
تسعد كــل مـن كــان حوليهــــا
وكــل مـن شافــا بكـــون اتشهّد
وتنـّى النظــرة ونظــرة تليهــــا
ويحمـد ربّــو ويشكــرو تانـــي
على الخيـرات الهــو مدلـّيهــــا
ومــن النـاس فــي القلبو رهيّف
بمــــلأ النظـــرة ومــا بتنّيهــــا
وبيهــــا يكون ولهـــان طوّالـي
وكــل لحظاتو يهضرب بيهــــا
عمّــك عنتــر لـو كــان شافــــا
كانـت عبلــة نســت ماضيهــــا
وقيـس لو كــان فـي وكتو لقاها
كانت ليلــى تمــوت من تيهــــا
وروميــو كمان لو شاف عينيها
أكان جوليــت ما لمّـــت فيهــــا
وأبّكرونــا كمــان لــو حاضــر
كانت حفصة تشوفلهــا جيهــــة
فيهــا نضارة وخضـرة وسمرة
ولونا طبيعــي وهـو محلـّيهــــا
وفيهـــا كتيــر حاجـات جذّابـــة
بالكلمـــات مــا أظــن أوفيهــــا
وكلـّــو ده كــان مـن أول نظرة
وسحبت مجرى القلـب عليهــــا
نحــن زمنـّــا ده كلـّــو بنكتـــب
إلا قلوبنــــــا شنـــو البرويهــــا
ونحـــن الشـــوف كمّلنا حدودو
ونحـنا العيــن القاســي مليهــــا


___________________________________
avatar
دمعات الندم
الاشراف العام
الاشراف العام

عدد المساهمات : 572
نقاط : 722
السٌّمعَة : 7
التسجيل : 11/04/2009

الرجوع الى أعلى الصفحة اذهب الى الأسفل

رد: مكتبة المبدع مستكاوي

مُساهمة من طرف دمعات الندم في الجمعة يونيو 25, 2010 5:19 am

العيد السعيد
العيد السعيد ان شـاء الله قدم العافية

الناس تنجمع بي روح جميلة وصافية

الخير ينهمر والنعمة تصبح طافية

والبلد ينصلح لا جنجويد لا مافية

في العيد السعيد ان شاء الله فضلة خيرنا

نغرق في النعيم ندي العقاب لي غيرنا

نصبح ناس فضل يكرم كبيرنا صغيرنا

وفي درب التقدم ينعدل تقديرنا

في العيد السعيد يا ربي زيل عارضنا

جنبنا العطال الكل يوم قارضنا

النوم في البيوت بالحيل صبح مارضنا

والفلس اللعين من كل مكان طاردنا

في العيد السعيد يا ربي تم مسعانا

نغرق في النعيم نتهني في دنيانا

نكسر في البيوت نرجع نحي قرانا

نلهط في الخبائز بي صنوف الوانا



العيد السعيد ان شاء اللع بي عافيتو

كل زول ما يريد ربك يحقق نيتو

الوطن الكبير تنحل لينا قضيتو

لا جوع لا حروب كل زول ينال حريت

___________________________________
avatar
دمعات الندم
الاشراف العام
الاشراف العام

عدد المساهمات : 572
نقاط : 722
السٌّمعَة : 7
التسجيل : 11/04/2009

الرجوع الى أعلى الصفحة اذهب الى الأسفل

رد: مكتبة المبدع مستكاوي

مُساهمة من طرف دمعات الندم في الجمعة يونيو 25, 2010 5:21 am

عولمة


عصـــــــــــر العولمة الراجينو
مرحـــــــــــــــب بيهو كميـــــة
سنيـــــن العمر ماشا تلـــــــــف
تلـــــــــــــف وتدور حوالـــــيَّ
وحـــــال الناس هو ياهو الحال
ده ما إتغيـــــــــر ولا شويــــــة
في نـاس مهووسة جارية جري
تقـــــول ساكـّـــالا سحليـــــــــة
تقضِّـــي اليوم نقل أخبــــــــــار
وفي الأخبـــــــــار شماريــــــة
تضيِّـــــــع في زمن غالــــــــي
وتشيــل أفكـــــــــــار جنونيـــة
ونـــــــاس بتقضي يوما زهـــج
ونـــــــاس بتكــــون فرايحيــــة
ونـــــــاس بالبيرقر الجامبـــــو
ونـــــــاس مالاقية طعميــــــــة
ونـــــــاس الهم عليها تقيـــــــل
ونـــــــاس الفيها محريـــــــــــة
ونـــــــاس بتنادي بالتأصيـــــل
وإسبيـــــــــــــــرات محليــــــة
ونـــــــاس بتجر أضان الفيــــل
ونـــــــاس في ضلـُّـو متكيـــــة
ونــاس بتكـــوش وناس بتدوش
ونــاس شاليهــــــــا اكل البوش
ونــاس ريموتها عند ناس بوش
ونــاس لارقـّــة لاإحســــــــاس
تمشّــــــي إمورا بالبرطـــــوش
ونــاس أكرِمنــــــــــــــــــا يالله
معاهــــــــــــــــــا وحــــــــوش
تجيهـــــــا النعمـــــــــة من الله
وبرضـــــــــــــــو تحــــــــوش
ونــــــاس بي قدرة الخالــــــــق
تمشِّــــي إمــــــورا بالنيـــــــــة
ونــــــاس بتفضّل الخطـــــوات
تكون بطريقة علمية
علوم بتطور التاريخ
تخلي الدنيا زي اوضة
انتر نت وموبايل
وناس بتجاري في الموضة
اخير يا ناي تذكروا اليوم
دي اصلو الدنيا مقروضة
وعند الخالق الدنيا
بتكون في شاشة معروضة
وعند الخالق الدنيا

دي ما بتساوي باعوضة

___________________________________
avatar
دمعات الندم
الاشراف العام
الاشراف العام

عدد المساهمات : 572
نقاط : 722
السٌّمعَة : 7
التسجيل : 11/04/2009

الرجوع الى أعلى الصفحة اذهب الى الأسفل

رد: مكتبة المبدع مستكاوي

مُساهمة من طرف دمعات الندم في الجمعة يونيو 25, 2010 5:24 am

من حكاوي المستكاوي
إن إسمي مستكاوي
للإساءة لست راوي
من يعثر لي طريقي
لن يفر من البلاوي
لا أميل إلى الحضارة
في زواياها البعيدة
في كلامي إستعارة
وفق آراءٍ سديدة
قد أزيد الشعر بحراً
في روايات فريدة
قد أعير الناس قلبي
وأبقي ماشي على الحديدة
ثم أطلب من يراعي
نظم أبيات شديدة
وأطربق وأنادي
في مواضيع عديدة
وأحيل الجو صحواً
فاتحاً أفقاً جديدة
وأطربق رغم إني
صاحب الرؤيا الرشيدة
وأدافر وأعافر
خلف حنجرتي التليدة
ما يليني من جضومٍ
فهي أورام حميدة
قد أهضرب في منامي
بالدجاج وبالمديده
وأحيل البوش بيتزا
يا لأحلامي السعيدة
وأهمهم وأرمرم
كالغضنفر والطريدة
وأخوض غمار حربٍ
كالأصابع في العصيدة
ثم أصحوا من منامي
رغم أحلامي السعيدة
كلها كانت هباءاً
كشمار في جريدة
وياجماعــــــــــة تعالـــــــوا نبدأ
نبدأ في ســـــــرد الوقــــــــــائع
والـــــــــــحقـــا ئـــق مستمــدة
مــن صميــم وحــي الطبيعــــــة
وفـــي قلوب النــاس نعايــــــــن
فبنا سئ وفينــــــــــــــا fine
ونــــاس ملولوة في طــــــــريقا
ونـاس مشيــــــــها as aline
ونـــاس تكرفس فـــــي وشوشا
وناس وشيشا طبيعـيshine
ونــاس drinking tea بقرفة
وناس دوام تديـــــــــهاwine
ونـــاس اساســـــــــا يوما عدي
ونـــاس ضعـــاف زي المـــرآين
ونـــاس عديـل مافيها كـــــــــدة
ونـــاس عليــها الغلب بايــــــــن
وزول قميصــو اللابســـو شــدة
وناس دوام في حال trying
ونـــاس بتنعـم بالمــــــــــــــودة
ونـــاس بتحلم تمشـــــــــي جدة
وفــي المنــــــام الكشـــة تبــدأ!!

___________________________________
avatar
دمعات الندم
الاشراف العام
الاشراف العام

عدد المساهمات : 572
نقاط : 722
السٌّمعَة : 7
التسجيل : 11/04/2009

الرجوع الى أعلى الصفحة اذهب الى الأسفل

رد: مكتبة المبدع مستكاوي

مُساهمة من طرف دمعات الندم في الجمعة يونيو 25, 2010 5:27 am

بـقـيـت زول ساي
بـقـيـت حوّام بقــــــــيت زوّاع
وضـد الـريـــح فردت شــــراع
سـلـكـت طــــريق كتير لــوّاع
وجـات المــــوجة فيـهـــا أزاي
بـقـيـت موجة علت بالحـيــــل
وداهمت السحاب بالليــــــــل
دمـوع زي مـطـرة كالت كيــل
وكـوّنـــت الخريف الجــــــــاي
بقـيـت نـقناق بقيت ثرثــــــــار
أصيــغ بي رؤيتي الافكـــــــار
أرص كـلمـات اقول اشعــــــار
وتـبقي ونستي بالدوبـــــــــاي
بقيـــت حسّــــــــــــــــــــاس
وخـايـف مـن كلام النّــــــــاس
وقـافل احسـاسي بي تربـاس
واقول للنــاس بكضـب ســـاي
بـقيـت مفتـــــــــــــــــــــــون
وتـايه في قضايــــــــــا الكون
دهاليـز ليلي والمجنـــــــــون
وقالـوا علي زول بكــــــــــاي
بقيـت نضّـــــــــــــــــــــــــام
أشوف بي رؤيتى الأحـــــلام
وأصيـغ سيناريو لي أفـــــلام
وأمثـل فلمي كلو بـــــــــراى
بقيـت طربـــــــــــــــــــــــاق
وبقرأ مدامع العشــــــــــــاق
وللـكلمات بقيت ســـــــــواق
والحداث هـو ماســــــــــواي
بقيـت سرحــــــــــــــــــــــان
بغـطي مشاعري بالكتمـــــان
وأعـاقب نفسي بالحرمــــــان
وكل الهم يكون جــــــــــــواي

___________________________________
avatar
دمعات الندم
الاشراف العام
الاشراف العام

عدد المساهمات : 572
نقاط : 722
السٌّمعَة : 7
التسجيل : 11/04/2009

الرجوع الى أعلى الصفحة اذهب الى الأسفل

رد: مكتبة المبدع مستكاوي

مُساهمة من طرف دمعات الندم في الجمعة يونيو 25, 2010 5:33 am

مقـــبرة الممــتاز



مقبرة الخصوم الليـــلة رقــــدت ريكة
والعجب الملك ماسك زمــــام تحريكة
لسة الجاي كتير والحل نهــايتو وشيكة
والبعمل شفت يلـــقانا نحــــنا الويـــكة
الليلة الزعيـــم في هيـــــبة يحمد سيدو
الممتازجمـــيل الليله جـــاب تحـــديدو
فى كل الخطـــوط نحنا العـــب بنجيدو
بالعجب الرهيب والزهره طمبل وميدو
مريخــــنا العظيم الليــــله موجك عاتى
البغلط عليك حرررم يكــــون الخـــاتى
طمبل طمبلـول جنب الشـــبك بعــــاتى
بى فد قون جمـيل قـــــام طير الشماتى
طمبل طمـــبلول الليله طـــــرق فاســو
دربــك داريوكــان بالقــرقريبه وعاسو
ضـــاق سيد البلد الليله شفـــنه مقاســـو
حــــارسنا الامين تماها بى نص راسو
ما كــــان العشــــم واللع تب يا ســـيدا
الألفاظ كمــان بالحــــيل بقيت بتـــجيدا
مخــرجنا الخطـــير أدانا لقطة فـــريدة
بنمشـــيها ليك ما بنســـعى لي تخلـــيدا
اي آر تي شهـــود إنو السفير أحــرجنا
و نحن الحاضرين يا ريتنا ما إتفــرجنا
عفـواً يا برنـــس الكاس كتير أبهــــجنا
عــــادي بننغلب لا ضقنا لا إتزهـــجنا
العجب الحبيب الزول دا ياخـي أعـذرو
للمنطــــق فقـــد ورانا آخـــــرو ونذرو
قائدنا الجســـور اللـــيلة تب زاد وزرو
و سفير النوايا خســـارة قـــــــلل قدرو
العجب العجـيب بالجـــــد عجبنا أداءو
بالحيل صال وجال ملك اللعبو أرجاءو
الناس الفصـــاح اللـــي فريقنا أســـاءو
بالقلم الهزيل ضاقوا الوجـــع و أعباءو
شكراً يا كروجر و مازدا و أبراهومة
الإنجــاز كبير بالفكـــرة و المعلـــومة
مقبرة الخصـــوم اليوم بقت مردومــة
خليتو الجمــــيع ينعق نعيـــق البومــة
في فرح الزعيــــم ورينا رايــك ياخـي
الأســـد الجســـور قدامنا يصـبح ناخي
خليك في الصميم من غيرخمول وتراخي
قطاعين رقاب نضرب ضرب سلاّخي
الخبر الأكيــــد ما فيـــهو أيّ تـــواني
كاسك يا الزعيم ما أظن يفـــوتك تاني
بالدرب العـــديل مــــابي القفا الوراني
بندك الحصون و البركة في تســخاني
أركان الزعيم صبحت حصون مأمونة
الكاسات دوام جوّة الجيوب مضمــونة
حولنا الرصــــيد حققنا أعلــــى مؤونة
شيدنا الديار كاسات و بوهـــية و مونة
دايـــماً للأمـــام ما بنلتفـت للمــــاضـي
كل دول الجوار أسســنا فيها أراضـــي
طوربيدنا الحبيب للجولة أحسن قاضي
خليك في الصميم وأختى الكلام الفاضي
أخوان الجنيد نعم الصــمود و الهيـــــبة
ماسكين النظـام بي روح جميلة و طيبة
حافظين للزعيم من غير غضاضة وريبة
و البجي في الطريق يادابو شاف الخيبة
مقبرة الخصــوم إليـــوم بقت منـكوبة
طوربيدنا الخطـــير ســـوالا دق اللوبة
مقصورة السواد مــا لامّة في راكــوبة
أســـرع يا الغـــزال أدينــا قلبة هـــوبة
الهدف الوحيد جـوة القليب قال حــارقو
دا المريخ خطــير أحسن تسيبو تفــارقو
نحن أهل الفنــون حتى اللــعب بنسارقو
أبشــر يا عجيب جـــاييك لسّــع وارقــو
في وسـط الغيـــوم نجمتنا فــوق بتلالي
مريخـــنا العظيم بالجد مقــامك عـــالي
من خلفك رجــال أمثال جمــال الوالـي
البـجـي في طريقنا بحـت كُنن و بلالي
جمهور الزعيم خليك معاي في الصورة
كاساتك دوام جـــوة القلــــوب محفـورة
نحن أهل الفنون و أسياد عمـوم الكورة
بي إستاد جميل من ناسو لي المقصورة
نحن أهل الزعيم جمهورنا دايـماً واعي
في كـل الظـــروف تلقاهو لينا مراعــي
خلــف الإنتـصار و الرفـعة دايماً ساعي
مجلســنا الوقور نعــم الأميــن الراعــي
نحن أهــل الكـــؤوس جوية أو أرضية
الطوربيد ضـرب و القصة تب مقضية
أبو القانـون تعـــال أمرقلــنا العرضـية
يا ناســنا العــزاز ما تلفـــظوا الفضــية
نحن جنود شبــاب مـانا العجاز كركبنا
بنشق البحــر و المــوج بخـاف مركبنا
بنخوض الدواس لا خفـــنا لا إتكبكــبنا
شد و أركـب عديل لكــن منو البركبـنا
في كل الظـروف مريخنـا بلعـب كورة
بي الزوق الجميل صفوتنا جد مشهورة
واثقين من سهام طوربيدنا والمقصورة
ما شفنا العجب فـي يوم بشوت قارورة
ده المريخ كبيــر بـــي حقو ما متسول
للافضـــــل دوام تلقــاهـو جـد متحـول
مجلسنـا الخبيــر بالحنكـة فيهــو نعـول
والبجـي فـي الطريق والله ليـلو بطـول
الممــتاز وصــل أثبتنا فيــهو وجــودنا
و في الكرم الأصيل في الدنيا باين جودنا
ما راجيــن وزير يسندنا يرفـع عــودنا
و البـدخل رويســنا نجيبو بي مجهودنا
القانون صريح و القصة ماها شــطارة
ما داخلنا سوس مانـا البنــرجـى وزارة
قـالوا أبو القوانين قلنا برضو حضــارة
ماسكــين النظــام إلاّ الظــروف غـدارة
عذراً يا النوايا العمـــلوا ليـــكي سفارة
كان قوي كان ضعـيف الكورة جد خرخارة
إعــلام الســــواد الباقي ليــنا شـــرارة
المعــدن صفيـــحة و اللســان قرقــارة
أركـــز يا الزعيــم الليـــلة يــوم النتــرة
اليوم الكلام فــي حضــرة أروع سـهرة
بي أروع جنود الصفـــوة جـــد مفتخرة
عجبي و طمبلي و في الإحتياط الزهرة
النضــــم الكتــــير و الله ياخـــي فلقـــنا
جبنا الكــاس عديل لا نمــنا لا إتسلقـــنا
جاهزين بي جيوشنا و لي رويسنا حلقنا
نحن أهل الــدواس و الحــل بجيبو قلقنا
شفنا مدرجات صاحبنا..(لِّب) .. مبسوطة
و حبيبنا الجنيد بالطــبلة عامل جــوطة
جمهورنا العظيم ساط الملاعب سـوطة
بي لغة الورق ممكـن نقــول مــربوطة
أخوان العجـب بي كل صــراحة أجادوا
صاروا مهندسين رسموا اللعب و أبعادو
عن ظاهر القلـوب للخطة درسوا و زادوا
خلّوا الشــوف طشاش و الله جد بترادوا
أكـــرم ود سلـــيم الخـبـرة جـاية معاهو
دامـرنا الجســور يــا ربي تم مســعاهـو
و سفــاري الأمــين يتهــنى في دنيــاهو
نتمـــنى الصـــلاح و العـــزة لي إيداهو
ندعـــــوك يا كــــريم رب العبـــاد يـا الله
مريـخنا العظيم في عمرو ما يشوف زلة
أكــرم بي عفـوك قدال و مـــــوسى و بلة
و إتولى الشغيل و عطــية ما يشوف عـلة
يا المتـربصيـن شوفــوا الكــــلام التالي
واتحرو الطـريق مريخـنا اصــــبح عالي
في الكنب السعــودي وجيمــي ود ناتالي
مافي مقـارنــات بيــن الهبــوب والوالي
تيـمــك يا الـرئيــس الوالــي ميـة المــية
سيرتك في البلاد بي كـل صـدق محمـية
جـيـهـــت الفـريـــق بالفـــرد والكـــمــية
نـعــم الالـتـــــزام والله فـيـــــك محــرية
يا رب العبــــــاد نـتهـنــي بــــي واليـــنا
والحـــظ السـعيـــد نـتـمنــــي لـــي اوبينا
جمهورنا العظيم انشاء الله يرضـي علينا
نتمنـي الـصمــــــود والعـــزة لـي نـاديـنا
والينـــا الحبيـــب يــا ربـي احفـــظ مــالو
يسعد بي الصلاح والرفعـة فـــي اعمــالو
الـــــزول الصـــدوق افعــالـو زي اقـوالو
مـن شـر الحســـود يـــا ربـي حسـن فالو
كـــل انجــاز جديـــد والله جــد بفــرحـنا
بعــــد الاجـتـهــاد الليلــة دابنـــا ارتحـنا
لـو درتـوا النظــام تلقونا في الوش نحـنا
وكان درتو الكجار حررم تشوفو المحنة
مريخنـا العظيــم ورانـــا لــون الجمــرة
اتوالـت جمـوعنـا وليهــو جـات معتمرة
لسة الجاي كتيـر مريخنـا عـينـك حمرة
يا نـاس الوصـيــف بالله اعملــوا عمـرة
المسكيـن كلتـشي الليلة قاموا عليـهو
ناسيـن فضلـو والاربـاب كمـان ناسيــهو
ده الكـــان الهـلال جـوة القلـيب خاتيـهو
ستاشـــر هـدف مفـروض يغفـــرن ليهو

___________________________________
avatar
دمعات الندم
الاشراف العام
الاشراف العام

عدد المساهمات : 572
نقاط : 722
السٌّمعَة : 7
التسجيل : 11/04/2009

الرجوع الى أعلى الصفحة اذهب الى الأسفل

رد: مكتبة المبدع مستكاوي

مُساهمة من طرف دمعات الندم في الجمعة يونيو 25, 2010 5:42 am

مدخل


يعني إيه لابتوب فقدتو

حاول انسى وشوف جديدك

وامشي في العزم العقدتو

إبتلاك الله البريدك

***

كان موثق لي كلامك

كان معينك وكان دليلك

كان جراب يحمل حسامك

خلي الله يكون وكيلك
النـّص:
[size=25]ضربة كانت جد قوية

سببت ليَّ الأذيَّة

ضربة خشَّت في عِظامي

خلـَّت الموضوع هُلامي
جاني لِص وحرامي رِمَّة
جازف اللابتوب بتاعي
زول لئيم ماعندو ذِمَّة
لي دمار الأُمَّة ساعي
يا كريم زلزل كيانو
ما يغادر من مكانو
ياعزيز في الدنيا ذلـّو
ما يفارق لي محلو
بسأل الله يحِت عظامو

يرخي بصرو ويفشي سِرُّو

وكل يوم يظهر حرامو

وكل مره الناس تزُرُّو

يبقى زول جربان مُنَفـِّر

يبقى حايم بس براهو

جلدو بالعاهات يـِصَفـِّر

أصلو ما يلحق شِفاهُو

ليهو اسبوعين معايَ

فيهو حاجاتي المُهمّة

اللئيم زاد ليْ أزايَ

حقق أفكارو المُسِمَّة

فيهو حاجات للمدارس

فيهو لي أطفالنا فرحة

فيهو مسرح للعرايس

فقـْدو سبَّبْ ليَّ جرحة

فيهو للأطفال مآرب

فيهو إنتاجي المُصوَّر

فيهو جد هاردسك كارِب

دا العلم بالجد تطوَّر

فيهو إحساس بالمعاني

فيهو إرشادات سلامه

المديح ثم الأغاني

فيهو أنواع الدراما

ربي ورِّي اللص وَساعو

ربي أعلن عن اُفـُولو

وبالعدم أقطع ضراعو

وابدا إستئصال رُجولو

ربي يبّس كل حنانو

واقطع الصوت من أضانو

ربي أعلن لي هوانو

كل يوم يبلع لسانو

ربي سلط ليهو مَرْضة

في دقيقة تقرضو قرضة

ربي عطل كل حواسو

يبقى ما زول من أساسو

ربي أرمي اللوم عليهو

أصلو ما يتهنـّى بيهو

ربي هد في راسو أوضه

يبقى أصغر من بعوضه

ربي ما يغمِّض عيونو

ربي كسِّر كل سنونو

ربي أرمي عليهو صاقعه

كلّ ما يقوم تبقى واقعه

ربي سلـّط عين تصيبو

وبي سِراع تقطع نصيبو

ربي فش خلق الله فيهو

شمّت الأطفال عليهو

ربي فصّلو حته حته

وفي السرير خليهو جـِتـّه

ربي يوت خليهو صاحي

عرضه لي دقشة سياحي

ربي عرّضو لي أزية

لايضوق عيد لا ضحية

ربي أحرقو يبقى شيّه

وللحِدَيْ يصبح تكيّه

ربي عرّضو لي العقارب

كل يوم خلـّيهو هارب

يبقى مجنون سلكو ضارب

كل يوم يشبع كهارب

ربي سلـّط ليهو ضبعه

كل ما يقوم يلقى لبعه

ربي خت في رجلو طلقه

كل يوم ياخدلو علقه

تبقى كل نكباتو خالده

يندرع في كلبه والده

تنتفض تديهو قرمه

يبقى سعران ليهو خرمه

ربي عتـّر فيهو أصَلـَة

وفي العيون أعصِرْلو بصَلة

ربي جيب تمساح يقـُرضو

وفي الأساس ما نلقى فرضو

ربي سلـّط ليهو حُوته

وأصلو ما تكتِبْلو مُوته

ربي حنـِّطو في حياتو

وفي المتاحف يلقى ذاتو

ربي كيل نخرينو شطـّه

وبالجنازير زيدو ربطه

ربي أوجع ليهو بطنو

جيبلو موية نار أعَطـْنـُو

ربي تصبح روحو شارده

يـِنشَرق بي مويه بارده

ربي ما ينبَلَّ ريقو

أعدم الخير من طريقو

ربي ياسيد الأسامي

كاشف الهم والبلاوي

بلـّغ اللص الحرامي

يختى درب المستكاوي

ربي لو جا وصفـّى نيتو

من جميع الفات عفِيتو

وليهو بتمنى الهداية

والتسامح لي النهاية

ربي ياكاشف المعاني

أصلح الحال العلينا

ما نضوق السّرقه تاني

وما تبين آثارا فينا
[/size]

___________________________________
avatar
دمعات الندم
الاشراف العام
الاشراف العام

عدد المساهمات : 572
نقاط : 722
السٌّمعَة : 7
التسجيل : 11/04/2009

الرجوع الى أعلى الصفحة اذهب الى الأسفل

رد: مكتبة المبدع مستكاوي

مُساهمة من طرف دمعات الندم في الجمعة يونيو 25, 2010 5:48 am


ا لو
الوظيفــــــــــة
إخوتــي فلنلـق ِنظــــــــــرة
في دهاليـــز الوظيفــــــــــة
نحتـفـي فيـــــــــها بشخـصٍ
فــي رواياتٍ طريفـــــــــــة
كـل مـا يعنيــــــــــــه منهــا
لقمـة العيـش الشـريفـــــــــة
يهـدرون الوقت جهــــــــراً
والسويعــات تبقى زيفــــــة
يشـرب الشاي نصف ساعة
ويقـرأ في ساعتين صحيفــة
يبقـي طول اليوم يتـرجـــــم
وجبـة البــوش الظريفـــــــة
ويشبعـون النــاس سخطــــاً
فـــي عبارات مخيفــــــــــة
للمـواطـن لايــــــــــــراعي
غازِّي كوعو تقول خليفــــة
يكـتـب البخـرات يــــــوزع
فـــي المواعيــد الكثيفـــــــة
إنتـوا أمـشـوا تعـالوا بُكـــرة
وإنتـواواسـطـاتكم ضعيـفــة
حـدو يـوميـــــــــن المـرتب
والجيــوب تصبـح نظيفــــة
الله عـالـم بـي حيـــــــــــاتو
وبـي مجـاراتــو العـنيـفــــة
بـكـرة تـتـلاشى المســـــافـة
والظــلال تصـبـح وريـفـــة
بيها تتصـلـّــح إمورنـــــــــا
والمواهــي يزيــد خريفــــه
تبقـي فــي إيدنـا التجـــــارة
والمــخابــز بــي رغيـفــــه
والوطــن يـصـبح منـــــارة
زي كـلام سـيــد خليـفـــــــة





ا لو ظيفةا لو

___________________________________
avatar
دمعات الندم
الاشراف العام
الاشراف العام

عدد المساهمات : 572
نقاط : 722
السٌّمعَة : 7
التسجيل : 11/04/2009

الرجوع الى أعلى الصفحة اذهب الى الأسفل

رد: مكتبة المبدع مستكاوي

مُساهمة من طرف دمعات الندم في الجمعة يونيو 25, 2010 5:51 am

الوحش والبعشوم
حظي التعيس الشوم
وقعني في البعشوم
لاقدرت تاني اقوم
لاقادر امرق احوم
الشي الحمانا النوم
كتر الشمار بالكوم
والقصة عامت عوم
والامر ما محسوم
اتجدع التنظير
كتر الكلام والقول
الوحش قالو خطير
والله ما معقول
ممكن يخش البير
لو حتي كان مقفول
بفتح وراك يطير
انشاء الله كان لي الحول
يقطع خطوط السير
لو حتي كان مشغول
كسر قزاز العير
ماخلي قدرة فول
قرم بهايم الحاج
ما بمسكنو كلاب
دخلنا في احراج
روعنا بي اسهاب
يوم داك جانا وهاج
زعمط شعر ماجداب
سكوهو بالنفاج
كتلوهو في السامراب
القصة زايدة رواج
من غير عدد وحساب
زي سطوة الحجاج
وقنابل الارباب
الكورة فن ومزاج
والكاس نشوفو سراب
مالقينا ليهو سياج
شتت هوي الاحباب
تور وراهو عجاج
روعنا والالباب
لاشفنا بعدو مزاج
لا راحة في الاهداب
اتشتتت افواج
واتقفلت ابواب
ما شفنا واحد حي
ماسكاهو دورية
ألا الكلام الني
الفيهو محرية
نطوي الحقائق طي
خلوها بالنية
باكر يجينا حدي
افكارو وحشية
واحدين يقولوا الشي
سلعوة مصرية
باكر يقولوا علي
راكباني جنية
ياربي زيل البي
بي كل حنية
واكشف خبايا الصي
بي كل شفافية
اخبارنا دفن الليل
ما بتخلو من اسرار
لاشفنا ليها دليل
لا شفنا خبراً سار
نلقاهو منفي عديل
نلقي الصور في الدار
حاجات تهد الحيل
وتعيق ضمرنا البار
وهمات تجفف نيل
ابراج عديل تنهار
مرات يجينا خليل
وتقوم حرابة ونار
حرفتنا في التهويل
وصياغة الافدار
وفساد سكون الليل
والهم بدون إشعار
يتضارب التعليل
والقصة زايدة ودار
بي الشفقة والتطبيل
يتزعزعو الاحرار
وثقافة التضليل
عمت كبار وصغار
نعقد نواصي الخيل
ونزيد حرصنا عيار
ونفرتق التشفير
نوزن صدي الاوتار
ونشدد التحذير
في عتمة الاسفار
نلمس نواصي الخير
ندي الحقيقة وقار
نعدل خطوط السير
ندي الحقيقة وقار
نتهني بالتحرير
دي بلدنا زوق وخضار
من سطوة الحيوان
ربي الكريم حراس
يا ربي يا منان
اكرم جميع الناس
احفظنا في السودان
والالفة لينا اساس
وبلدنا تبقي امان
نلقي الدهب والماس
يتجمعو الاخوان
بالالفة والاحساس
والكل يكون فنان
لاكابلي لا ترباس
نتجلي في الميدان
كورتنا تاخد الكاس
يتوقف الدشمان
تتوحد الانفاس
نبقي الجميع اخوان
والوالي بي افراس
الجودة ليها مكان
نرجو الحقيقة تبين
تتجلي بالالوان
نسأل نكون حارصين
نعرف مدي الحيوانش
ربك كريم ومعين
والمستكاوي كمان
تم ليهو نصف الدين
بي صوت جهور وملان
الناس تقول امين

___________________________________
avatar
دمعات الندم
الاشراف العام
الاشراف العام

عدد المساهمات : 572
نقاط : 722
السٌّمعَة : 7
التسجيل : 11/04/2009

الرجوع الى أعلى الصفحة اذهب الى الأسفل

رد: مكتبة المبدع مستكاوي

مُساهمة من طرف دمعات الندم في الجمعة يونيو 25, 2010 5:53 am

[size=25][size=29]الأنوفلس


أيـا أنــثي الأنـــوفــلــس غـــــادريـنا

ومــالــــك إنــتــي دايــــرة تجنـــنـينا

تــزوري مــن تـشـــآئـي كـــل يـــوم

وصــرفــا فــي الــعــلاج تفلــفليــــنا

وعـنــد مـجــيــئـك المـشــــؤوم حتما

يطــير النـــوم حــيــث تـغـلــغــلـــينا

فــنــبــدأ ســعــيـنــا بــقــرار فـحـص

بــــدمٍ أبــيـــــض وهمــقـلـوبـيــــــنـا

ونــدخــل للـطـبــيـــب ســديـــد رأي

ونــبـــدأ بـــالــعــــلاج كــلــوركـــينا

تــخــطـيــنــا الــعــلاج بـــدون فـرز

فـهــذا شـــأنــه خــــطـأً مــبـــيــــــنا

ولانــقــفــز إلــي الـكــيــنــيــن رأسـاً

عـــواقــــبــه تـــــثــور وتـمـــتــطينا

كـــفــــانـــــا الله شَـــــرَّك يـــاعـــدوًّ

يـــصــنَّـف فـــي عـــــداد المارقيـــنا

فــدأبــــك والــذبــاب قـــصــاد شـــرٍّ

ودومــا للــمـضـار مُفــبـــرِكـــيـــــنا

بــنـــامــوســيــة نـــقــصــيـــك جنباً

وحـيــــنا بالـــتـــراب ســتردُميــــــنا

إذا ردمـــــت بـيــوتــك مــن مــيــــاهٍ

فــأيــــن ستحتـــمــين وتلــــبديـــــــنا

نـصبُّ الـزيــت فــى مــرســاك دوماً

لــــنـمـكــث فــى منـــــامٍ هانـئيــــــنا

سـنــبـدأحــربـنـــا مـن غــيـر صُــلحٍ

وبالـهــجـر المـخيــف سـتـوسعيـــــنا

سـنـُلقــي فـي طـريـقك غصــن شوك

ونــــســـعــي للــوقـــايــة مابــقـيـــنا

سـيــصــبــح كـلـنــا مــنــهــا مـعافى

وتــصـــبــح فـي عِــداد المبــعديــــنا
[/size][/size]

___________________________________
avatar
دمعات الندم
الاشراف العام
الاشراف العام

عدد المساهمات : 572
نقاط : 722
السٌّمعَة : 7
التسجيل : 11/04/2009

الرجوع الى أعلى الصفحة اذهب الى الأسفل

رد: مكتبة المبدع مستكاوي

مُساهمة من طرف دمعات الندم في الثلاثاء يونيو 29, 2010 1:00 am

مرثية الكلبة سدني
سدني ياناس فارقتنا
وبالمحنة هي عذبتنا
تاني وين نلقي المحبة
والحزن اصبح معبا

سدني جيرمن اصل راقي
اعلنت بالجد فراقي
ديمة حاملة الابتسامة
والجمال مالك قوامة
ديمة في عينيها لمعة
خلفت في عيني دمعة
القراد في صوفا مافي
حركت فينا القوفي
كنت بسعد يوم ظهورا
ديمة مستويات ظفورا
فيها صوف احساسو ناعم
والادب لي سدني داعم
سدني يا اجمل رفيقة
تاني مافيش فيك طريقة
سدني فارقت المدائن
والحزن بيناتنا بائن
كلبة جد كانت وفية
لي صديقة وروحا حية
ريدا في جواي حامي
وما بتخاف من الحرامي
اللصوص عارفين مقاما
والكلاب سامعين كلاما
هيبة في كل الشوارع
الذكاء الفيها بارع
كلبة كانت جد قيافة
قمة في الذوق واللطافة
ما بتعرف للازية
احترام الضيف مزية

بين كلاب الحلة قامة
ما بتاكل في القمامة
الحبيبة دي يوما تم
والحزن بيناتنا عم

الخبر غالبنا بلعو
ما بتهرش زول تخلعو
ما بتاخد غير نصيبا
عين وصابتا بي مصيبة

___________________________________
avatar
دمعات الندم
الاشراف العام
الاشراف العام

عدد المساهمات : 572
نقاط : 722
السٌّمعَة : 7
التسجيل : 11/04/2009

الرجوع الى أعلى الصفحة اذهب الى الأسفل

رد: مكتبة المبدع مستكاوي

مُساهمة من طرف دمعات الندم في الثلاثاء يونيو 29, 2010 1:10 am

رمضانيات
في الشهر الكريـــم يا ربي اغفر لينا
بي الصفح الجميـــل من القديم اعفينا
نــــــزل رحمتك مـــن كوثرك اسقينا
بـــي فضلــك وعطفـك للجنان اهدينا
فــــي الشهر الكريم يا ربـــي اتولانا
بي كرمك وجودك زيل مواضع ازانا
اغفـــر للجميـــع يا ربــــي يا مولانا
هون لــي امورنا وشــل فكر اعدانا

___________________________________
avatar
دمعات الندم
الاشراف العام
الاشراف العام

عدد المساهمات : 572
نقاط : 722
السٌّمعَة : 7
التسجيل : 11/04/2009

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى